पश्चिमी वायुको प्रभावले वर्षा र हिमपातको सम्भावना
मकालु खबर
काठमाडौं । नेपालको माथिल्लो वायुमण्डलमा पश्चिमी न्यूनचापीय प्रणालीको आंशिक प्रभाव पर्दा देशका विभिन्न भागको मौसममा परिवर्तन आएको छ । यसकै प्रभावस्वरूप आज देशका पहाडी तथा हिमाली भेगमा वर्षा र हिमपातको सम्भावना रहेको जल तथा मौसम विज्ञान विभागले जनाएको छ ।
मौसम पूर्वानुमान महाशाखाका अनुसार, दिउँसो विशेषगरी कोशी, बागमती र गण्डकी प्रदेशका पहाडी तथा हिमाली भूभागमा मौसम साधारणतया बदली रहनेछ । बाँकी प्रदेशका पहाडी तथा हिमाली क्षेत्रमा भने आंशिक मात्र बदली हुनेछ । यी तीन प्रदेश (कोशी, बागमती र गण्डकी) का केही स्थान र अन्य प्रदेशका एक–दुई ठाउँमा मेघगर्जन र चट्याङसहित हल्का वर्षा हुने सम्भावना छ । साथै, सोही क्षेत्रका उच्च पहाडी तथा हिमाली भेगमा हल्का हिमपातसमेत हुने प्रक्षेपण गरिएको छ ।
तराईका जिल्लाहरूमा दिउँसोको समयमा मौसम मुख्यतया सफा रहने भए पनि बिहानीपख भने केही स्थानमा हुस्सु लाग्ने महाशाखाले जनाएको छ ।
आज रातिको समयमा पनि देशका हिमाली भेगमा मौसम साधारणतया बदली नै रहनेछ। पहाडी क्षेत्रमा आंशिक बदली हुनेछ भने तराईको मौसम सफा रहनेछ । यद्यपि, रातिको समयमा तराईका केही सीमित स्थानमा तुवाँलो लाग्न सक्ने अनुमान छ ।
महाशाखाको पछिल्लो बुलेटिनअनुसार, राति कोशी, गण्डकी र कर्णाली प्रदेशका उच्च हिमाली भूभागका एक-दुई स्थानमा मेघगर्जनसहित हल्का वर्षा र हिउँ पर्ने सम्भावना कायमै रहनेछ । मौसममा आएको यो परिवर्तनसँगै चिसोबाट बच्न आवश्यक सतर्कता अपनाउन सम्बन्धित सबैमा अनुरोध गरिएको छ ।
मकालु खबर
