‘जेन-जी संविधान’ जारी गर्नुपर्ने माग गर्दै माइतीघरमा अनसन

काठमाडौँ । जेन–जी संविधान जारी गर्न माग गर्दै जेन–जी युवा पुस्ताको एउटा समूह अनसनमा बसेको छ ।

जेन–जी विद्रोहको भावनाअनुरुपको जेनजी संविधान यही फागुन १५ गते सार्वजनिक गर्नुपर्ने मागसहित उक्त समूह काठमाडौँको माइतीघर मण्डलामा अनसनमा बसेको हो ।

अनसनरत जेन–जी युवा जनार्दन अधिकारीले जेन–जी शहीदहरूमाथि राज्यसत्तामा बस्नेहरूले भद्दा मजाक गरिरहेको भन्दै त्यस्तो नगर्न चेतावनी दिए ।

उनले जेन–जी आन्दोलनको मुख्य माग व्यवस्था र अवस्था दुवै बदल्नु रहेको भन्दै सरकारको ध्यानाकर्षण पनि गराए । उनले २०८४ सालमा हुने निर्वाचन २०८२ सालमै गराउनको लागि जेन–जीहरूले बलिदानी नदिएको स्पष्ट पार्दै यसतर्फ सरोकारवालाहरूको ध्यान पुग्न जरुरी रहेको बताए ।

वर्तमान संविधान पूर्णरुपमा खारेज गरी जेन–जी संविधान जारी गर्नुपर्ने उनीहरूको माग छ ।