अतिवाद र कुशासनको चेपुवामा मुलुक: निर्वाचनमार्फत निकास खोज्ने नेकपाको दाबी

काठमाडौँ । नेपाली कम्युनिष्ट पार्टीका नेता अग्निप्रसाद सापकोटाले आगामी निर्वाचनपछि आफ्नो पार्टी मुलुकको पहिलो शक्तिका रूपमा उदय हुने दाबी गरेका छन् ।

मंगलवार पार्टी केन्द्रीय कार्यालय पेरिसडाँडामा आयोजित पत्रकार सम्मेलनमा बोल्दै नेता सापकोटाले देशभरबाट प्राप्त रिपोर्टका आधारमा पार्टी पहिलो बन्ने निश्चित भएको बताएका हुन् ।

प्रतिनिधि सभा सदस्य निर्वाचन फागुन २१ गते देशभर हुँदैछ । सोही निर्वाचनका माध्यमबाट देशभर नेकपा सबैभन्दा ठुलो शक्ति बन्ने उनले दाबी गरे ।

निर्वाचन सुनिश्चिततामा पार्टीको निर्णायक भूमिका

नेता सापकोटाले देश जटिल र संवेदनशील परिस्थितिबाट गुज्रिरहेको बताए । जटिल अवस्थामा केही दलले निर्वाचन नचाहेको भए पनि आफ्नो पार्टीले तोकिएको समयमै निर्वाचन हुनुपर्ने अडान लिएका कारण आज देश निर्वाचनको निर्णायक चरणमा पुगेको बताए ।

उनले भने ‘हाम्रो अडान वस्तुगत परिस्थितिको सही विश्लेषण थियो भन्ने पुष्टि भएको छ ।’

दुई प्रकारका अतिवादको चुनौती

मुलुक यतिबेला दुई प्रकारका अतिवादको चेपुवामा परेको सापकोटाको विश्लेषण छ । एकातिर दलाल र बिचौलियाको आडमा कुशासन चलाउने र युवाहरूको आन्दोलनलाई दमन गर्ने प्रवृत्ति रहेको र अर्कोतर्फ जनभावनालाई प्रयोग गर्दै राष्ट्रिय सम्पदाहरूमाथि आगजनी र आक्रमण गर्ने अराजक अतिवाद रहेको उनले बताए ।

उनले दुवै प्रकारका अतिवाद राष्ट्रिय स्वाधीनता र समृद्धिका लागि हानिकारक रहेको स्पष्ट पारे ।

मिडियाको भूमिका र आचारसंहितामा प्रश्न

निर्वाचनका बेला केही सञ्चार माध्यमले पत्रकारिताको न्यूनतम मान्यता र आचारसंहिता विपरीत भ्रामक सूचना फैलाएर पार्टीलाई अवमूल्यन गर्न खोजेको भन्दै उनले आपत्ति जनाए ।

‘निर्वाचन आयोगले आचारसंहिता विपरीतका गतिविधि विरुद्ध प्रभावकारी कदम चालोस् र प्रेस काउन्सिलले निष्पक्ष अनुगमन गरोस् ।’ उनले आग्रह गरे ।

विशेष गरी निर्वाचन प्रभावित पार्ने गरी गरिने मत सर्वेक्षणहरू प्रति उनले सञ्चार जगतलाई सचेत गराए ।

देशको पहिलो पार्टी बन्ने दाबी

पत्रकारहरूको जिज्ञासाको उत्तर दिँदै सापकोटाले देशभरको उत्साह र रिपोर्टका आधारमा पार्टी पहिलो बन्ने बताए ।

‘मञ्चमा बस्ने हामी सबैको निष्कर्ष के छ भने हाम्रो पार्टी पहिलो पार्टी बन्छ । नेपालको पहिलो पार्टी अब नेपाली कम्युनिष्ट पार्टी बन्छ भन्ने कुराको रिपोर्ट देशभरिबाट आइराखेको छ ।’ उनले आत्मविश्वासका साथ भने ।

उनले सम्पूर्ण नेपाली जनतालाई पार्टीका प्रतिबद्धता र आगामी रोडम्यापको गहिरो मूल्याङ्कन गर्दै विवेकपूर्ण निर्णय गर्न आह्वान गरे ।