झापा-५ मा ओलीको ‘रिपोर्ट कार्ड’ : ७ पक्की पुलदेखि स्मार्ट सिटीसम्म, सचिव बस्नेतले सार्वजनिक गरे २५ उपलब्धि !

काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीको गृह निर्वाचन क्षेत्र झापा क्षेत्र-५ मा पछिल्लो १५ वर्षमा अभूतपूर्व विकास भएको दाबीसहित एमाले नेतृत्वले त्यसको ‘रिपोर्ट कार्ड’ सार्वजनिक गरेको छ । एमाले सचिव महेश बस्नेतले अध्यक्ष ओलीको नेतृत्वमा यस क्षेत्रले भौतिक पूर्वाधार, शिक्षा, स्वास्थ्य र कृषिका क्षेत्रमा प्राप्त गरेका उपलब्धिलाई ‘ठोस परिवर्तन र भविष्यको नक्सा’ को रूपमा प्रस्तुत गरेका हुन् ।

ओलीको कार्यकालमा झापा-५ मा यातायात र कनेक्टिभिटीका क्षेत्रमा ठूलो फड्को मारिएको बस्नेतको दाबी छ । सार्वजनिक विवरण अनुसार राजमार्ग बाहेकका स्थानमा रतुवा नदीमा मात्रै ७ वटा पक्की तथा झोलुङ्गे पुलहरू निर्माण भएका छन् । त्यस्तै, कमल खोला र मावा खोलामा विभिन्न स्थानलाई जोड्ने गरी आधुनिक पुलहरू निर्माण गरिएका छन् ।

सडक सञ्जालतर्फ पाडाजुगी-जिम्दारचोक ४ लेन सडक विस्तार, मदन भण्डारी राजमार्ग र हुलाकी राजमार्गको निर्माणमा तीव्रता, र मंगलबारे-क्याम्पा जस्ता ग्रामीण सडकहरूको स्तरोन्नतिलाई ओलीको कार्यकालका प्रमुख उपलब्धिका रूपमा लिइएको छ । यी सडक सञ्जालले यस क्षेत्रको आर्थिक गतिविधि र बजार पहुँचलाई सहज बनाएको छ ।

विकासलाई मानवीय संवेदनासँग जोड्दै दमकमा विपन्न र सुकुम्बासी वर्गका लागि ‘नमुना बस्ती’ निर्माण गरिएको छ । यो आयोजनालाई मुलुककै उदाहरणीय आवास कार्यक्रमका रूपमा लिइएको छ । त्यस्तै, गौरिगन्जलाई ‘स्मार्ट सिटी’ का रूपमा विकास गर्न पूर्वाधार निर्माणका कार्यहरू अघि बढाइएको छ भने दमक बजारको सौन्दर्यीकरण र नदी ब्युटिफिकेसनका कामहरूले नगरको स्वरूप बदलेको छ ।

ओलीले आफ्नो क्षेत्रलाई शैक्षिक र प्राविधिक केन्द्र बनाउन विशेष पहल गरेको सचिव बस्नेतले उल्लेख गरेका छन् । दमकमा सिटिइभिटी क्याम्पस सञ्चालन र गौरदहमा कृषि क्याम्पसको स्थापना हुनु यस क्षेत्रका लागि ठूलो शैक्षिक उपलब्धि हो । जनता मावि (गौरदह), दमक बहुमुखी क्याम्पस, दुलारी-डुकुरपानी मावि र हिमालय मावि लगायतका विद्यालयहरूमा भौतिक पूर्वाधार विस्तार गरी शैक्षिक गुणस्तर सुधारमा जोड दिइएको छ ।

यसैगरी, कृषि क्षेत्रमा आधुनिकीकरणका लागि नमुना सहकारी खेती प्रवर्द्धन र पूर्वाधार सहयोगलाई प्राथमिकता दिइएको छ, जसले स्थानीय किसानहरूको आयआर्जनमा सुधार ल्याउने अपेक्षा गरिएको छ ।

झापाको मुख्य समस्याका रूपमा रहेको नदी कटान नियन्त्रणका लागि रतुवा र मावा नदीमा किलोमिटरौँ लामो तटबन्ध निर्माण सम्पन्न भएका छन् । यसले वर्षायाममा हुने जनधनको क्षति न्यूनीकरणमा उल्लेख्य सहयोग पुर्‍याएको छ । साथै, यस क्षेत्रमा रोजगारी सिर्जनाका लागि औद्योगिक क्षेत्र निर्माणको प्रक्रिया स्वरूप जग्गा अधिग्रहण जस्ता प्रारम्भिक कामहरू सम्पन्न भइसकेका छन् । ‘पछिल्ला १५ वर्षमा देखिएको विकास र भविष्यको नक्साले झापा-५ को मुहार फेरिएको छ,’ बस्नेतले सामाजिक सञ्जालमार्फत भनेका छन् ।