आ बाट आमा: भावनात्मक दर्शकलाई हेर्न लायक, सशक्त प्रस्तुति खोज्नेलाई हल्का बोरिङ

एक समय दर्शकबाट वाहवाही बटुल्न सफल अभिनेता पल शाहको करिअर चलचित्र ‘रामायण’पछि भने केही ओरालो लागेको देखिन्थ्यो । निरन्तर अपेक्षाअनुसारको सफलता आउन नसक्दा उनको फिल्मी यात्रामाथि प्रश्नहरू उठ्न थाले । यसबीच उनले अभिनय गरेको चलचित्र ‘मोहर’ ले भने उनलाई केही हदसम्म राहत दिलायो र फेरि दर्शकमाझ नयाँ आशा जगायो ।

अब, यसपटक पल शाहले चन्द्र पन्तद्वारा निर्देशित पारिवारिक तथा भावनात्मक ड्रामा ‘आ बाट आमा’ लिएर दर्शकमाझ उपस्थित भएका छन् । आमाको माया, त्याग र सम्बन्धको गहिराइलाई केन्द्रमा राखिएको यो चलचित्रले पल शाहको करिअरमा कस्तो प्रभाव छोड्ला? के उनले दर्शकको भरोसा फेरि जित्न सक्लान् त?

त्यसो भए, चलचित्र ‘आ बाट आमा’कस्तो बनेको छ त? आउनुहोस्, चर्चा गरौँ।

यस फिल्ममा अभिनिता पल शाहसंगै भारतीय चर्चित अभिनेता प्रदीप रावत, नेपाली कलाकारहरू बिपना थापा, उषा उप्रेती, सिमरन पन्त र साइग्रेस पोखरेल लगायतको अभिनय रहेको छ ।

फिल्ममा प्रदीप रावतले ‘वासुदेव’, बिपना थापाले ‘देवकी’, पल शाहले ‘कृष्ण’, उषा उप्रेतीले ‘राधा’ र सिमरन पन्तले ‘रुक्मिणी’ को होइन ‘श्री’ पात्रको भूमिका निभाएकी छन् ।

फिल्मको सुरुवात देवकी र वासुदेव दम्पतीको शान्त र आनन्दमय जीवनबाट हुन्छ । सबैथोक हुँदाहुँदै पनि उनीहरूको जीवनमा एउटा अपूरो पाटो छ—सन्तानको अभाव । समयसँगै, उनीहरूको सन्तानका रूपमा कृष्ण (पल शाह) जन्मिन्छन्।

कृष्ण र राधा बाल्यकालदेखि नै असल मित्र हुन् । उनीहरूको सम्बन्ध सरल र निश्छल छ । तर ब्याचलर पछि उनीहरूको जीवनले नयाँ मोड लिन्छ ।

राधा गाउँकै विद्यालयमा शिक्षिकाको रूपमा पढाउन थाल्छिन्, उता, कृष्ण भने लामो प्रयासपछि पनि कतै काम पाउन सक्दैनन् । असफलता, निराशा र भविष्यप्रतिको डरले उनलाई क्रमशः गलत निर्णयतर्फ धकेल्छ । अन्ततः अवैध बाटो हुँदै अमेरिका जाने निर्णय कष्णको जीवनको निर्णायक मोड बन्छ ।
यही निर्णयसँगै कथा नयाँ दिशातर्फ मोडिन्छ । पारिवारिक सम्बन्ध, सपना र यथार्थबीचको द्वन्द्वलाई समेट्दै चलचित्र क्रमशः कौतुहलता बोकेर अघि बढ्छ ।

सकारात्मक पक्ष
‘आ बाट आमा’ एक गहिरो भावनात्मक पारिवारिक ड्रामा हो, जसले नेपाली समाजको यथार्थलाई संवेदनशील ढंगले पर्दामा उतारेको छ । छोराले आफ्नो भविष्य सुरक्षित बनाउने चाहना, त्यसका लागि स्वदेशमै अवसर नपाउँदा विदेशिनु पर्ने बाध्यता, र त्यसबीच आमाबुबाप्रति मनभित्र लुकेको अपार माया—यी सबै भावनात्मक तहलाई चलचित्रले सशक्त रूपमा प्रस्तुत गर्छ ।

चलचित्रले आजको पुस्ताले भोगिरहेको विदेश मोह र त्यसले परिवारमा पार्ने मानसिक तथा भावनात्मक असरलाई सरल तर गहिरो रूपमा देखाउँछ । सन्तानको सफलताका लागि आमाबुबाले गर्ने निःस्वार्थ त्याग, उनीहरूको मौन पीडा र आशाले भरिएको प्रतीक्षा— फिल्म हेर्दा यी पक्षहरूले दर्शकलाई भक्कानिने गरी रुवाउँछन् ।

विशेष गरी, आमा–छोराबीचको सम्बन्धलाई फिल्मले अत्यन्त संवेदनशील ढंगले बुनेको छ । ममतामय सम्बन्ध चलचित्रको सबैभन्दा बलियो पक्ष हो । यही भावनात्मक गहिराइका कारण ‘आ बाट आमा’ केवल एउटा फिल्म मात्र नभई, धेरै नेपाली परिवारको प्रतिबिम्ब हो ।
समग्रमा भन्नुपर्दा , भावनात्मक अनुभूति खोज्ने दर्शकका लागि ‘आ बाट आमा’ एक अर्थपूर्ण र मन छुने चलचित्र हो।

नकारात्मक पक्ष
चलचित्र ‘आ बाट आमा’ मा भावनालाई दर्शकसम्म पुर्‍याउने प्रयास प्रशंसनीय भए पनि कतिपय स्थानमा त्यो प्रयास जबरजस्ती भावुक बनाउने दिशातर्फ गएको अनुभूति हुन्छ । कथा स्वाभाविक रूपमा भावनात्मक हुँदाहुँदै पनि केही दृश्यहरू अनावश्यक रूपमा तन्काइएको छ, जसले प्रभावभन्दा बढी थकान पैदा गर्छ ।
चलचित्रको सुरुआत र अन्त्य स्ट्रङ भएपनि करिब २ घण्टा ४० मिनेट अवधिको यो फिल्म मध्यभागमा पुगेपछि बोरिङ बन्छ । त्यसपछि सस्पेन्स होइन कथासँग डिस्कनेक्ट टाइपको फिल हुन्छ ।

साउथका चर्चित अभिनेता प्रदीप रावत जस्तो अनुभवी कलाकारलाई चलचित्रले अपेक्षाअनुसार प्रयोग गर्न सकेको छैन । उनको पात्र कथा अगाडि बढाउनेभन्दा पनि केवल भावुक दृश्यहरूका लागि सीमित भएको जस्तो देखिन्छ । अधिकांश दृश्यहरूमा आमा–छोराको रोदनमै केन्द्रित हुँदा भावनात्मक दोहोरिन पैदा हुन्छ, जसले चलचित्रलाई कताकता भारतीय मेलोड्रामाको झल्को दिन्छ ।

यद्यपि गीतहरू भने मन छुने खालका छन् र केही दृश्यहरू सुन्दर रूपमा खिचिएका छन्, तर समग्र संरचनामा सन्तुलनको कमी महसुस हुन्छ । निर्माता–निर्देशकले भावनात्मक प्रस्तुतिसंगै कथाको गति बीच अझ राम्रो तालमेल मिलाउन सकेका भए, ‘आ बाट आमा’ अझ प्रभावकारी र स्मरणीय बन्न सक्थ्यो ।

भावनात्मक चलचित्र मन पराउने दर्शकका लागि ‘आ बाट आमा’ एकपटक हेर्न लायक चलचित्र हो । तर सशक्त प्रस्तुति खोज्ने दर्शकलाई भने यो चलचित्र केही बोरिङ र लामो लाग्न सक्छ । समग्रमा भन्नुपर्दा ट्रेलर र टिजर हेरेपछिको पल शाहको फिल्मबाट अपेक्षा गरिएको उत्साह र भरोसा यस फिल्मले पूर्ण रूपमा पुरा गर्न सकेको छैन ।

फिल्म एभरेज खालको मात्र छ ।

Aa Bata Aama: Emotional drama, somewhat slow-paced