काठमाडौँ महानगरपालिकाबाट ४२ हजार ८५६ विद्युतीय सिफारिस जारी

काठमाडौँ । काठमाडौँ महानगरपालिकाले ४२ हजार ८ सय ५६ सय विद्युतीय सिफारिस जारी गरेको छ ।

प्रमुख प्रशासकीय अधिकृत सरोज गुरागाईँको अध्यक्षतामा सोमवार विभागीय प्रमुख, वडा सचिव, लेखापाल र इन्जिनियर सहभागी बैठकमा विद्युतीय सेवाका लागि सञ्चालन गरिएको ‘सिफारिस तथा प्रमाणित प्रक्रिया व्यवस्थापन प्रणाली’लाई थप परिष्कृत गर्दै लैजाने विषयमा छलफल गर्दै सूचना प्रविधि विभागका प्रमुख अनिरुद्र नेपालले यो तथ्याङ्क दिएका हुन् ।

महानगरपालिकाले यो प्रणाली २०८१ माघ १३ गतेबाट कार्यान्वयनमा ल्याएको हो । त्यस दिनदेखि अहिलेसम्म ३५ हजार ४४ जनाले विभिन्न सिफारिसका लागि अनलाइनबाट आवेदन दिएका हुन् ।

जसमध्ये गएको वर्ष २३ हजार ८६३ वटा र यस वर्ष १८ हजार ९९३ वटा गरी ४२ हजार ८५६ वटा सिफारिस अनलाइनबाटै स्वीकृत भएका हुन् । चालु आर्थिक वर्षमा मात्र अनलाइनबाट सिफारिस माग गर्नेको संख्या २० हजार ३९८ जना सेवाग्राही छन् ।

यो प्रणालीमा १९५ प्रकारका सेवासँग सम्बन्धित ढाँचा राखिएका छन् ।