भूइँचालोको दश वर्षपछि केशर पुस्तकालय फेरि ब्युँतियो

काठमाडौं । वि.सं. २०७२ सालको भूकम्पले क्षतिग्रस्त बनाएको केशर महलमा रहेको केशर पुस्तकालय भूकम्प गएको दश वर्षपछि फेरि पुरानै अवस्थामा सञ्चालनमा आएको छ । यस पुस्तकालयमा अहिले दैनिक करिब ३०० जना अध्ययन गर्न आउने गरेका छन्, जसले यसलाई पठन संस्कृतिमा रुची राख्नेहरूको गन्तव्य बनाएको छ ।

भूकम्पले केशर महललाई क्षति पुर्याएपछि पुस्तकालयलाई टहरामा सारिएको थियो । पुरातत्व विभागको मापदण्डअनुसार पुरानै शैलीमा महलको सबलीकरण भएपछि पुस्तकालय आफ्नै भवनमा फर्किएको हो । अहिले पुस्तकालय सञ्चालनमा आएको एक वर्षपछि अध्ययनशील शहरीयाहरूको आकर्षणको केन्द्र बनेको छ ।

केशर पुस्तकालयको स्थापना केशर शमशेरको व्यक्तिगत चाहनामा भएको थियो । चन्द्र शमशेरका छोरा केशर शमशेरलाई किशोरावस्थादेखि नै पुस्तक र पत्रपत्रिका सङ्कलन गर्ने सोख थियो । बेलायतको भ्रमणपछि उनको ज्ञानप्रतिको मोह अझै बढ्यो । नेपाल फर्किएपछि उनले पुस्तक सङ्कलनमा जोड दिँदै यस पुस्तकालयको स्थापना गरे ।

हाल शिक्षा, विज्ञान तथा प्रविधि मन्त्रालय पनि सोही महलबाट सञ्चालन भइरहेकोले पुस्तकालयको ठाउँ केही साँघुरिएको छ । तैपनि, यसले अध्येताहरूलाई आकर्षित गर्न छाडेको छैन । नेपालको पहिलो सरकारी पुस्तकालयको रूपमा केशर पुस्तकालयले आफ्नो ऐतिहासिक महत्व र शैक्षिक योगदानलाई निरन्तरता दिइरहेको छ ।