पुटिनसँग हंगेरीमा भेट हुन्छ : ट्रम्प

काठमाडौं । अमेरिकी राष्ट्रपति डोनाल्ड ट्रम्पले रुस-युक्रेन द्वन्द्वको समाधानका लागि रुसी समकक्षी भ्लादिमिर पुटिनसँग हंगेरीको राजधानी बुडापेस्टमा भेट्ने घोषणा गरेका छन् । दुई नेताबीचको महत्त्वपूर्ण टेलिफोन वार्तालापपछि ट्रम्पले बिहीबार यो जानकारी गराएका हुन् ।

ट्रम्पका अनुसार, यस भेटवार्ताको तयारीस्वरूप दुई देशले आगामी हप्ता उच्चस्तरीय सल्लाहकारहरूको बैठक आयोजना गर्ने सहमति जनाएका छन् । यस बैठकमा अमेरिकी विदेशमन्त्री मार्को रुबियोले अमेरिकी प्रतिनिधिमण्डलको नेतृत्व गर्नेछन् भने बैठकको स्थान पछि निर्धारण गरिनेछ ।

यो घोषणा युक्रेनी राष्ट्रपति भोलोडिमिर जेलेन्स्कीको ह्वाइट हाउस भ्रमणको एक दिनअगाडि आएको हो, जसले यस क्षेत्रीय द्वन्द्व समाधानका लागि अमेरिकाको सक्रियतालाई थप जोड दिएको छ ।

स्मरण रहोस्, ट्रम्प र पुटिनबीच यसअघि गत अगस्टमा अमेरिकी राज्य अलास्कामा भेटवार्ता भएको थियो । यसपटकको बुडापेस्ट भेटवार्ताले द्वन्द्व समाधानका लागि कस्तो नयाँ मोड ल्याउनेछ भन्नेमा अन्तर्राष्ट्रिय समुदायको ध्यान केन्द्रित भएको छ ।