कोशी र गण्डकीका पहाडी भूभागमा भारी वर्षाको सम्भावना

काठमाडौँ । मनसुनलाई सक्रिय बनाउने न्यून चापीय रेखा आफ्नो औसत स्थानभन्दा दक्षिणतर्फ सरेकाले नेपालमा मनसुनी गतिविधि केही कमजोर बनेको छ। यद्यपि, बङ्गालको खाडीबाट जलवाष्पयुक्त हावा भित्रिने क्रम जारी रहँदा देशका विभिन्न भागमा वर्षाको सम्भावना भने कायमै रहेको मौसम पूर्वानुमान महाशाखाले जनाएको छ।

महाशाखाका अनुसार, हाल कोशी र सुदूरपश्चिम प्रदेशसहित देशका पहाडी भूभागमा मौसम सामान्यतया बदली रहेको छ भने तराईका क्षेत्रमा आंशिक बदली देखिएको छ। कोशी, बागमती, गण्डकी, कर्णाली र सुदूरपश्चिम प्रदेशका पहाडी इलाकाका केही स्थानहरूमा हल्कादेखि मध्यम वर्षा भइरहेको छ।

आज दिउँसो पनि लुम्बिनी, कर्णाली र सुदूरपश्चिम प्रदेशसहित देशका अधिकांश पहाडी भूभागमा मौसम सामान्यतया बदली रहनेछ भने केही स्थानमा मध्यम वर्षाको सम्भावना छ। तराईका एक-दुई स्थानमा पनि हल्का वर्षा हुन सक्ने पूर्वानुमान गरिएको छ।

आज राति भने मौसममा केही परिवर्तन देखिनेछ। विशेषगरी कोशी, मधेस, बागमती र गण्डकी प्रदेशमा मौसम सामान्यतया बदली रही केही स्थानमा मध्यम वर्षाको सम्भावना छ।

महाशाखाले आज राति कोशी र गण्डकी प्रदेशका पहाडी भूभागका एक-दुई स्थानमा भारी वर्षा हुन सक्ने भन्दै विशेष सतर्कता अपनाउन सबैमा अनुरोध गरेको छ। भारी वर्षाले ती क्षेत्रहरूमा बाढी, पहिरो तथा भूक्षयको जोखिम बढाउन सक्ने भएकाले नदी किनार र तटीय क्षेत्रमा बसोबास गर्नेहरूलाई उच्च सावधानी अपनाउन आग्रह गरिएको छ।