उपसभामुख स्वदेश फर्किएपछि हटाउने तयारीमा सत्ता गठबन्धन, साना दललाई फकाइँदै
मकालु खबर
काठमाडौं । उपसभामुख इन्दिरा राना मगरबारे उठेको प्रश्नको निरूपण आवश्यक रहेको निष्कर्षमा सत्ता गठबन्धन पुगेको छ ।
संसदसँग सम्बन्धित भ्रमणका सिलसिलामा अमेरिका पुगेकी उपसभामुखबारे जारी विवादका बीच बसेको गठबन्धनको बैठकले यो विषय निष्कर्षमा पुर्याउनुपर्ने ठहर गरेको हो ।
सांसदहरूको भिजिट भिसा प्रकरण र उपसभामुखको विदेश भ्रमणले संसदमै बहस चर्किएपछि प्रमुख दलहरू छलफलमा बसेका हुन् ।
प्रमुख प्रतिपक्षी नेकपा एमालेका प्रमुख सचेतक महेश बर्तौलाले उपसभामुखबारे उठेका प्रश्नको निरूपण गर्नु पर्ने आवश्यकता देखिएको बताए ।
‘उहाँ अहिले संसद्को जिम्मेवारीमै विदेश जानुभएको हो वा निजी भ्रमणमा जानुभएको हो भन्ने स्पष्ट छैन’, बर्तौलाले भने, ‘उहाँको भूमिकामाथि प्रश्न उठेकाले अब यसको निरूपण आवश्यक छ । कुन विधिबाट जाने भन्नेबारे छलफल भइरहेको छ ।’
उनले हालै उपसभामुखविरुद्ध तत्काल प्रस्ताव दर्ता गर्ने निष्कर्षमा भने गठबन्धन नपुगेको स्पष्ट पारे । ‘हामी अहिले छलफलमै छौं, प्रस्ताव दर्ता गर्ने निर्णय भएको छैन’, उनले भने ।
यसैबीच, नेपाली कांग्रेस र एमालेले उपसभामुख हटाउने तयारी स्वरूप दुई तिहाइ बहुमत सुनिश्चित गर्न साना दलहरूसँग संवाद तीव्र बनाएका छन् ।
एमाले निकट स्रोतका अनुसार उपसभामुख राना मगर अमेरिका भ्रमणबाट फर्किएपछि मात्र प्रस्ताव दर्ता गर्ने तयारी छ ।
मकालु खबर
