सूचना प्रविधि, सुशासन र विकास
आज सूचना र सञ्चार टेक्नोलोजी, आईसीटी अथवा आईटी सुशासनका लागि मात्र होइन, विकास र मानिसको दिनचर्याका लागि अपरिहार्य भइसकेको छ। हामी आईटीबिना चल्नै नसक्ने अवस्थामा पुगिसकेका छौँ। पहिलो कुरा, आईटीको प्रयोग केका लागि भन्दा देशलाई सुव्यवस्थित बनाउन, समाजलाई सुव्यवस्थित बनाउन, मानव समाजलाई अझ सभ्य, अझ परिष्कृत, अझ उन्नत बनाउन र देशमा सुशासन अझ सुदृढ गर्न, आईटीको प्रयोगलाई सुशासनको सहयोगीको रूपमा, समाजको सुप्रबन्धका लागि सहयोगीको रूपमा, भ्रष्टाचार नियन्त्रणका लागि सहयोगीको रूपमा र जनतालाई सेवा-सुविधा पुर्याउने कुरामा सहयोगीको रूपमा आईटीलाई प्रयोग गर्न चाहन्छौँ। आईटी एउटा सोख मात्रै होइन, अनिवार्य आवश्यकता बनेको छ। आईटीले हाम्रो विकासलाई तीव्रता दिनुपर्छ। टेक्नोलोजी भनेकै त्यही हो, जसले विकासलाई व्यापकता र तीव्रता दिन्छ। नवीनता त्यसका लागि आवश्यकता छ र नवीनता दिन्छ। यसले समाजमा पारस्परिक रूपमा मानवीय भावना, पारस्परिक प्रेम, सद्भाव, सहिष्णुताको विकासका निमित्त सहयोग गर्नुपर्छ। हामीले सूचना प्रविधिलाई त्यसै हिसाबले प्रयोग गर्नुपर्छ। यही कुरालाई ध्यानमा राखेर हामीले आईटीलाई डिजिटल नेपालको नाराका साथ अगाडि बढाएका छौँ। सिङ्गै देशलाई डिजिटलाइज्ड गर्ने र त्यसको अधिकतम सदुपयोग गर्ने। त्यसैअनुसार नै म अघिल्लो पल्ट प्रधानमन्त्री हुँदैदेखि डिजिटल नेपाल फ्रेमवर्क बनाएका थियौँ। अहिलेसम्मका अनुभव र प्रगतिहरूलाई हेरेर हामीले फ्रेमवर्क २.० अर्को चरणमा प्रवेश गराएका छौँ र त्यस फ्रेमवर्कलाई अगाडि बढाउँदै छौँ।
म यस प्रविधिको प्रयोगलाई शिक्षाको क्षेत्रमा, स्वास्थ्यको क्षेत्रमा र अरू विभिन्न क्षेत्रहरूमा पनि यसको सदुपयोग गरेर समाजलाई लाभान्वित गराउने पक्षमा म आफैँ पनि क्रियाशील रहेको छु। सरकार क्रियाशील रहेको छ र हामी हरेकले यस सन्दर्भमा प्रयास गर्नुपर्छ। हामीले एउटा मात्रै सानो उदाहरण दियौँ भने, गत वर्ष नेपालको एसईईको परीक्षाको नतिजामा पास हुनेको सङ्ख्या ४८ प्रतिशतभन्दा कम थियो र गत वर्षबाट हामीले सुरुदेखि नै यो प्रतिशतलाई वा ४८ भन्दा कम रहेको प्रतिशतलाई ७० प्रतिशत पुर्याउने भनेका थियौँ। पछि हामीले केही संशोधन गर्नुपर्यो र हामीले ६० देखि ६५ प्रतिशतसम्म पुर्याउँछौँ भनेर हाम्रा केही युवा साथीहरूले अनलाइन कक्षाको सुरुवात गर्नुभयो। त्यसका निमित्त एउटा अभियान चलाउनुभयो। देशव्यापी रूपमा विभिन्न ठाउँका विद्यालय विद्यालयमा गएर त्यहाँका प्रिन्सिपलहरूलाई, त्यहाँका शिक्षकहरूलाई, त्यहाँका विद्यार्थीहरूलाई, त्यहाँका अभिभावकहरूलाई प्रेरित गर्नुभयो। र देशभरि दुई सयभन्दा बढी मेन्टर र धेरै दर्जन शिक्षकहरू राखेर एकै ठाउँ काठमाडौँबाट कक्षाहरू सञ्चालन गर्नुभयो र पछि हामीले ६० देखि ६५ प्रतिशतको बिचमा नतिजा निकाल्छौँ भन्यौँ। यो नितान्त निजी प्रयास हो हाम्रा युवाहरूको। त्यसमा सरकारी सहयोग भनेको सञ्चार मन्त्रालयले हामीलाई त्यो उपलब्ध गरायो। हामी युवाहरूलाई जहाँ सेवा पुर्याउँछौँ भनेको छ, त्यहाँ-त्यहाँ इन्टरनेट सर्भिस उपलब्ध गराइदिनुभयो। त्यस हिसाबले प्रयास गर्दाखेरि ६१.८१ प्रतिशत अथवा ६२ प्रतिशत उत्तीर्ण भए। ४८ बाट ६२ प्रतिशत अर्थात् १४ प्रतिशतका दरले एसईईको नतिजामा उन्नति भयो। यो हामीले देखेका छौँ, सानो खर्चबाट देशभरिका लाखौँ विद्यार्थीहरूको सङ्ख्यामा १४ प्रतिशतले उत्तीर्ण हुनेको सङ्ख्या अभिवृद्धि भयो, बढ्यो। तसर्थ, यसै गरेर हामीले अनलाइन स्वास्थ्य, अनलाइन स्वास्थ्य परीक्षण, अनलाइन उपचारजस्ता कुराहरू पनि विभिन्न हस्पिटलहरूबाट मद्दत गरेका छौँ र साना हस्पिटलहरूले ठुला हस्पिटलहरूबाट विशेषज्ञ सेवाहरू लिन सकिरहेका छन्। त्यो हामी आफैँले प्रत्यक्ष यी केही वर्षहरूमा मात्रै अनुभव गरेका छौँ। मैले प्रधानमन्त्री चलाएको यो पछिल्लो एक वर्षको अवधिमा असाधारण ढङ्गले हामीले यस क्षेत्रमा पनि प्रगति गरेका छौँ।
हामीसँग एउटा राम्रो पक्ष के छ भने हामीसँग एउटा यो ‘डेमोग्राफिक डिभिडेन्ड’ हाम्रो राम्रो छ। त्यसलाई हामीले यस क्षेत्रमा प्रयोग गर्न सक्छौँ किनभने हाम्रा युवाहरू आज आम रूपमा भन्ने हो भने डिजिटल फ्रेन्ड्ली छन् अथवा डिजिटल क्षेत्रमा, आईटी सेक्टरमा भन्ने हो भने उनीहरू शिक्षित कमसेकम छन्। उनीहरूले विभिन्न ढङ्गले त्यसबाट नलेज लिन र नलेज सम्प्रेषण गर्न सक्छन्। त्यसकारण नवप्रवर्तनका कुराहरू, इनोभेसनका कुराहरू वा अरू रिसर्चका कुराहरूदेखि लिएर आईटीको प्रयोगले हामीलाई धेरै ठुलो मद्दत पुगिरहेको छ र हामी समाज परिवर्तनका लागि यी सबै कुरा, मान्छेको विकासका लागि सबै कुरा, अर्थतन्त्रको विकासका लागि, शिक्षा, स्वास्थ्य र सबै सामाजिक क्षेत्रको विकासका लागि र समाजमा जनतालाई सेवा-सुविधा पुर्याउनका लागि यी कुराहरूमा काम गरिरहेका छौँ। अहिले हामीले यो पर्सनल आईटीजस्ता कुराहरू यिनीहरूबाट जनतालाई सेवा पुर्याउने कुराहरू गरिरहेका छौँ र अनेक पक्षहरूमा यसको मद्दत पुगिरहेको छ। यो सँगसँगै, यसमा केही कमजोरी पक्षहरू, विकृतिका पक्षहरू र विज्ञान प्रविधिको प्रयोग ठीक ढङ्गले गर्न जानेनन् भने, मेसिन चलाउँदा ठीक ढङ्गले चलाइएन भने त हात काटिदिन्छ। त्यो त मेसिन भनेको ठीक ढङ्गले चलाउने कि नचलाउने भन्ने कुरासँग निर्भर हुने कुरा हो।
अहिलेको दुनियाँमा यस इन्फर्मेसन टेक्नोलोजीको राम्ररी सदुपयोग मात्रै भएको छ भन्न सकिँदैन। खासगरी इन्फर्मेसनको सेक्टरमा, मिसइन्फर्मेसन, डिसइन्फर्मेसनजस्ता कुराहरू पनि यसबाट केही केही क्षतिका कुराहरू पनि भइरहेका छन्। समाजलाई अलि विकृति बढाउने खालका कुराहरू पनि भइरहेका छन् र यस्ता कुराहरूप्रति हामी सजग छौँ। सबै कुरा हुन पाउनुपर्छ। वास्तवमा यो प्रेस स्वतन्त्र, इन्फर्मेसनको स्वतन्त्रता सबै कुरा हुनुपर्छ तर अनियन्त्रित र समाजलाई हानि गर्ने गरी होइन, समाजलाई फाइदा पुग्ने गरी यी कुराहरू हुनुपर्छ। समाजका लागि आईटी, विकासका लागि आईटी, राष्ट्रिय एकताका लागि आईटी, विश्व शान्तिको पक्षमा आईटी, सूचना मनोरञ्जनका लागि आईटी, शिक्षाका लागि आईटी, स्वास्थ्यका लागि आईटी। यसो भएर हामीले आईटीलाई सदुपयोग गर्न सक्नुपर्छ राम्ररी।
हाम्रो राष्ट्रिय आकाङ्क्षा हामीले भनेका छौँ– ‘समृद्ध नेपाल, सुखी नेपाली’। त्यो हाम्रो राष्ट्रिय आकाङ्क्षा हो। त्यो आकाङ्क्षा परिपूर्ति गर्नका लागि, त्यसलाई प्राप्त गर्न, त्यसलाई गन्तव्य बनाएर हामी हिँडिरहेका छौँ र त्यसको प्राप्तिका लागि सुशासन र विकास, तीव्रता, सुदृढता र तीव्रताका साथ अगाडि बढाउन जरुरी छ। त्यसमा आईटीको भरपुर मद्दत लिन जरुरी छ। यो अत्यन्तै उपयोगी छ।
तसर्थ, हामी यसको सदुपयोग गर्दै देशका लागि, जनताका लागि, समाजका लागि र मानव जातिका लागि यसको सदुपयोग गर्ने, सुशासन र विकासका लागि सदुपयोग गर्ने काम गर्दै अगाडि बढ्ने यस दिशामा हामी लागि राखेका छौँ।
यस सन्दर्भमा तपाईंहरूले आयोजना गर्नुभएको विश्व आईटी सम्मेलन २०२२ ले अवश्य नै ठुलो योगदान गर्नेछ भन्ने मैले विश्वास लिएको छु। यही विश्वासका साथ म तपाईंहरूलाई धेरै धेरै शुभकामना भन्न चाहन्छु। तपाईंहरू यस दिशामा अझ तीव्रताका साथ अगाडि बढ्न सक्नुहोस्, अझ ठुलो योगदान गर्न सक्नुहोस् र यसका निमित्त हामीले कानुन बनाएका छौँ। भर्खरै हामीले एआई पोलिसी तय गरेका छौँ। यी सबै कुराहरूको उपयोग गर्नुहोस्। हामीले भर्खरै कानुनी हिसाबले नै यहाँको आईटी उत्पादनलाई निर्यात गर्न सहजै सक्ने कुरा, यहीँ बसेर लाभ गर्न सक्ने कुरा र बाहिर त्यसका निमित्त कम्पनी खोल्न सक्ने कुरा, विदेशमा कम्पनी खोल्न सक्ने कुरा आदि कुराहरूमा पनि कानुन निर्माण गरेरै अगाडि बढेका छौँ। तसर्थ म यहाँहरू सबैमा यस कामलाई सदुपयोग गर्ने दिशामा सोचेर अगाडि बढ्न आग्रह गर्न चाहन्छु।
- (प्रधानमन्त्री केपी शर्मा ओलीले राष्ट्रिय युवा सङ्घ नेपालद्वारा आयोजित विश्व आईटी सम्मेलनमा व्यक्त गर्नुभएको मन्तव्यको आधारमा प्रधानमन्त्रीको स्वकीय सचिवालयले तयार पारेको सम्पादित अंश)
