सांसद बस्नेको प्रश्न- विद्यालय शिक्षा विधेयकमा ढिलाइ हुनुको मुख्य जिम्मेवार को हो ?
मकालु खबर
काठमाडौँ । नेकपा (माओवादी केन्द्र) का सांसद शक्तिबहादुर बस्नेतले विद्यालय शिक्षा विधेयक पास गर्न ढिलाइ गरेको भन्दै सरकारको आलोचना गरेका छन् ।
प्रतिनिधि सभाको मंगलवारको बैठकमा बोल्दै उनले शिक्षा विधेयक ढिलाइ हुनुको कारणबारे सरकारले स्पष्ट पार्नुपर्ने बताए । उनले शिक्षक महासंघसँग सरकारले गरेको प्रतिवद्धताअनुसार विधेयक पास नहुनु सरकारकै कमजोरी भएको आरोप समेत लगाए ।
उनले खोक्रा कुरा गरेर सरकारको औचित्य पुष्टि नहुने उनको टिप्पणी छ । उनले सरकारले आफ्नो औचित्य पुष्टि गर्नको लागि सुशासनको प्रत्याभूतिदेखि जनता र राष्ट्रको हित हुने काम गर्नुपर्ने बताए ।
उनले भने ‘शिक्षक महासंंघलाई हामीले असार १५ गतेभित्र शिक्षा विधेयक पास गर्ने भनेका थियौँ । अहिले शिक्षा विधेयक कहाँ छ ? यसमा ढिलाइ हुनुमा को जिम्मेवार हो ? जसको जवाफ दिन जरुरी छ । खोक्रा कुरा गरेर सरकारको औचित्य साबित हुँदैन । यसरी सरकारको रक्षा कवच समेत बन्न सकिँदैन । यस विषयमा सरकार गम्भीर बनोस् ।’
उनले सरकारको गैरजिम्मेवार व्यवहारका कारण कैलालीमा कैदिबन्दीबीच झडप भएको उल्लेख गर्दै कारागार सुधार कार्यविधि बनाउन सरकारको ध्यानाकर्षण गराए ।
मकालु खबर
