माओवादी स्थायी कमिटी बैठक आज टुङ्गिदै, प्रचण्डले जवाफ दिने

काठमाडौं । शनिबारदेखि पेरिसडाँडास्थित पार्टी केन्द्रीय कार्यालयमा जारी नेकपा (माओवादी केन्द्र) को स्थायी कमिटी बैठक आज सक्ने तयारी छ । तीन दिनसम्म चलेको बैठकमा अध्यक्ष पुष्पकमल दाहाल ‘प्रचण्ड’द्वारा प्रस्तुत राजनीतिक प्रतिवेदनमाथि गहन छलफल भएको छ ।

बैठकको आजको सत्रमा महासचिव देवप्रसाद गुरुङ र वरिष्ठ उपाध्यक्ष नारायणकाजी श्रेष्ठले आफ्नो मन्तव्य राख्ने कार्यक्रम रहेको छ । उनीहरुले धारणा राखिसकेपछि अध्यक्ष प्रचण्डले सदस्यहरुले उठाएका प्रश्न र सुझाबहरुमाथि जवाफ दिने र त्यसपछि बैठक समापन गरिने उपाध्यक्ष अग्निप्रसाद सापकोटाले जानकारी दिए ।

शनिबार र आइतबारको बैठकमा अधिकांश स्थायी कमिटी सदस्यहरुले अध्यक्ष प्रचण्डको दस्तावेजमाथि आ-आफ्नो विचार राखिसकेका छन् । बैठकमा उपमहासचिव जनार्दन शर्मा लगायतका केही नेताहरुले प्रचण्डको दस्तावेजमाथि आलोचनात्मक टिप्पणी गरेका थिए । शर्माले विशेष महाधिवेशनको माग समेत अघि सारेका छन्, जसप्रति अन्य सदस्यहरुले भने आत्मालोचना गर्न सुझाब दिएका छन् ।

आइतबारको बैठकमा उपमहासचिव शर्माले पार्टीको मत ३१ लाखबाट ११ लाखमा झर्नुको कारणबारे प्रश्न उठाउँदै नेतृत्वप्रति कटाक्ष गरेका थिए । उनले पार्टीले संघीयताको स्वामित्व लिन नसकेको र पहिचानको मुद्दा छाडेको आरोप लगाए । बैठकमा बोल्ने अन्य सदस्यहरुले भने प्रचण्डको नेतृत्वको बचाउ गर्दै शर्माको अभिव्यक्तिको आलोचना गरेका थिए । 

पार्टीभित्र देखिएको वैचारिक अस्पष्टता र संगठनात्मक अराजकताका विषयमा बैठकमा चर्को बहस भएको छ । यद्यपि, अधिकांश सदस्यहरुले प्रचण्डको दस्तावेजलाई समर्थन गर्दै उनको नेतृत्वको आवश्यकतामा जोड दिएका छन् । अध्यक्ष प्रचण्डले बैठकमा उठेका सबै विषयलाई समेटेर जवाफ दिने र पार्टीलाई एकताबद्ध बनाएर लैजाने प्रतिबद्धता व्यक्त गर्ने अपेक्षा गरिएको छ ।