फाइनल प्रवेशका लागि आयोजक मलेसियाको सामना गर्दै नेपाल
मकालु खबर
काठमाडौं । १६ वर्षमुनिको एसीसी इस्ट जोन कप क्रिकेट प्रतियोगिताको उपाधि जित्ने लक्ष्यका साथ नेपाली युवा टोली आज (बिहीबार) सेमिफाइनलमा घरेलु टोली मलेसियाविरुद्ध मैदान उत्रँदैछ । समूह चरणमा अपराजित रहँदै सनसनीपूर्ण प्रदर्शन गरेको नेपाल उच्च मनोबलका साथ फाइनल प्रवेश गर्ने दाउमा छ।
मलेसियाको क्वालालम्पुरस्थित सेलान्गोर टर्फ क्लबमा हुने यो महत्त्वपूर्ण भिडन्त नेपाली समयअनुसार बिहान ७:४५ बजे सुरु हुनेछ । समूह ‘ए’ को विजेताका रूपमा सेमिफाइनलमा स्थान बनाएको नेपालले प्रतियोगितामा हालसम्म आफूलाई प्रमुख उपाधि दाबेदारका रूपमा स्थापित गरिसकेको छ ।
समूह चरणमा नेपालको प्रदर्शन अविश्वसनीय रह्यो । सिंगापुर र जापानलाई क्रमशः ६ र ९ विकेटले सहजै पराजित गरेको नेपालले ब्याटिङमा आफ्नो शक्ति प्रदर्शन गर्दै इन्डोनेसियालाई ३७० रन र भुटानलाई २९८ रनको विशाल अन्तरले हराएको थियो । यी शानदार जितहरूले नेपाली टोलीको आत्मविश्वासलाई शिखरमा पुर्याएको छ । ब्याटिङ र बलिङ दुवैमा सन्तुलित प्रदर्शन गरिरहेको नेपाल आजको खेलमा पनि सोही लयलाई निरन्तरता दिन चाहन्छ ।
यता, नेपालको प्रतिस्पर्धी आयोजक मलेसिया भने समूह ‘बी’ को उपविजेता हो । घरेलु मैदान र दर्शकको फाइदा उठाउँदै मलेसिया पनि नेपाललाई स्तब्ध पारेर फाइनल पुग्ने रणनीतिमा हुनेछ । त्यसैले आजको खेल प्रतिस्पर्धात्मक हुने अपेक्षा गरिएको छ ।
प्रतियोगिताअन्तर्गत आजै हुने दोस्रो सेमिफाइनलमा समूह ‘बी’ को विजेता हङकङ र समूह ‘ए’ को उपविजेता सिंगापुरबीच प्रतिस्पर्धा हुँदैछ । आजका सेमिफाइनलमा विजयी हुने टोलीहरू असार २१ गते हुने फाइनलमा उपाधिका लागि भिड्नेछन् भने पराजित हुने दुई टोलीले तेस्रो स्थानका लागि प्रतिस्पर्धा गर्नेछन् ।
मकालु खबर
