सुदूरपश्चिममा भीषण वर्षा, जनजीवन प्रभावित

काठमाडौं । सोमबार बिहानैदेखि परेको अविरल तथा भारी वर्षाका कारण सुदूरपश्चिम प्रदेशको जनजीवन अस्तव्यस्त बनेको छ । प्रदेशका कैलाली, कञ्चनपुर, डडेल्धुरा लगायतका जिल्लामा भएको भीषण वर्षाले तराईका भूभाग डुबानको उच्च जोखिममा परेका छन् भने पहाडी क्षेत्रमा पहिरोको त्रास बढेको छ ।

विशेषगरी कैलालीको धनगढी र गोदावरी क्षेत्रमा केन्द्रित मुसलधारे वर्षाले मोहना नदीमा पानीको सतह खतराको तह नजिक पुगेको छ । जिल्ला प्रशासन कार्यालय कैलालीका अनुसार, मोहना नदीको जलस्तरले सतर्कता तह पार गरिसकेको छ । प्रशासकीय अधिकृत शिवराज जोशीले दिएको जानकारीअनुसार, आइतबार बिहान ७:३० बजेको मापनमा नदीको जलस्तर ३.०६ मिटर पुगेको छ, जुन सतर्कता तहभन्दा माथि हो ।

नदीको जलस्तर अझै बढ्ने क्रममा रहेकाले तटीय क्षेत्रका बासिन्दालाई सुरक्षित रहन अपिल गरिएको छ । बाढीको जोखिमलाई मध्यनजर गर्दै जल तथा मौसम विज्ञान विभागले नदी किनार आसपासका बासिन्दालाई आज साँझसम्मै उच्च सतर्कता अपनाउन आग्रह गरेको छ । सम्भावित खतराबाट जोगाउन प्रशासनले जोखिमयुक्त क्षेत्रका नागरिकहरूलाई मोबाइलमा एसएमएसमार्फत सचेत गराइसकेको छ ।

यसैबीच, मौसम पूर्वानुमान महाशाखाले आज दिनभर देशभर मनसुनी वायुको प्रभाव सक्रिय रहने जनाएको छ । महाशाखाका अनुसार, सुदूरपश्चिम प्रदेशका अधिकांश स्थानमा मेघ गर्जन र चट्याङसहित हल्कादेखि मध्यम वर्षा जारी रहनेछ । साथै, प्रदेशका केही स्थानमा भारीदेखि धेरै भारी वर्षाको समेत सम्भावना रहेकाले बाढी, पहिरो र डुबानको जोखिम अझै टरिनसकेको भन्दै सम्बन्धित सबैलाई सावधानी अपनाउन भनिएको छ ।