प्रतिनिधि सभा बैठक : सरकारको नीति तथा कार्यक्रममाथि छलफल हुने कार्यसूची
मकालु खबर
काठमाडौं । संघीय संसद् अन्तर्गत प्रतिनिधि सभाको बैठक सोमबार बिहान संघीय संसद् भवन, नयाँ बानेश्वरमा बस्दैछ । बैठकमा चालु आर्थिक वर्षका लागि सरकारद्वारा प्रस्तुत नीति तथा कार्यक्रममाथि विस्तृत छलफल हुने कार्यक्रम रहेको छ ।
गत वैशाख १९ गते राष्ट्रपति रामचन्द्र पौडेलले संघीय संसद्को दुवै सदनको संयुक्त बैठकमार्फत सरकारको वार्षिक नीति तथा कार्यक्रम प्रस्तुत गरेका थिए । आजको बैठकमा प्रधानमन्त्री केपी शर्मा ओलीले सो नीति तथा कार्यक्रममाथि छलफल प्रारम्भ गरियोस् भन्ने प्रस्ताव पेश गर्नेछन् ।
संसद् सचिवालयका अनुसार प्रधानमन्त्रीको प्रस्तावपछि नीति तथा कार्यक्रममाथि सांसदहरूबाट दर्ता गरिएका संशोधन प्रस्तावहरू प्रस्तुत हुनेछन् । त्यसपछिको चरणमा सांसदहरूले आफ्नो धारणा राख्दै नीति तथा कार्यक्रममाथि व्यापक छलफल गर्नेछन् ।
सरकारको नीति तथा कार्यक्रम मुलुकको आर्थिक, सामाजिक, भौतिक तथा सुशासनसम्बन्धी प्राथमिकता र योजनाको खाका हो, जसले आगामी आर्थिक वर्षमा सरकारको कार्यदिशा संकेत गर्दछ । आजको छलफलपछि नीति तथा कार्यक्रम अनुमोदनका प्रक्रियामा प्रवेश गर्नेछ ।
मकालु खबर
