सहकारी ठगीमा पक्राउ परेकी कांग्रेस सांसदलाई तीन दिन हिरासतमा राख्न अनुमति

काठमाडौं । नेपाली काँग्रेसकी सांसद माया राईलाई तीन दिन हिरासतमा राखेर अनुसन्धान गर्न अदालतले अनुमति दिएको छ ।

काठमाडौं जिल्ला अदालतले राईलाई ३ दिन हिरासतमा राखेर अनुसन्धान अघि बढाउन अनुमति दिएको हो ।

सांसद राईलाई कालीमाटीस्थित स्वर्णलक्ष्मी बचत तथा ऋण सहकारी प्रकरणमा पक्राउ गरिएको थियो ।

राई स्वर्णलक्ष्मी सहकारी संस्थाको सञ्चालक समितिमा सहसचिवको पदमा कार्यरत थिइन् । प्रारम्भमा उनलाई उन्मुक्ति दिइएको थियो, जसको कारण चौतर्फी आलोचना पनि भएको थियो ।

तर, हालको अनुसन्धानले राई र अन्य पाँच व्यक्तिविरुद्ध मुद्दा दायर गरेको छ, जसमा ६९० बचतकर्ताको १ अर्ब १९ करोड ३० लाख ९० हजार रुपैयाँ हिनामिना गरेको आरोप छ ।