संविधान संशोधन साझा सवाल हो, साझा ढङ्गले समाधान गरौँला : प्रधानमन्त्री
मकालु खबर
काठमाडौं । प्रधानमन्त्री केपी शर्मा ओलीले संविधान संशोधनको विषय साझा सवाल भएको भन्दै साझा ढंगले समाधान गरिने बताएका छन् ।
बिहीवार प्रतिनिधि सभा बैठकमा सांसद नारायणी शर्माको प्रश्नको जवाफ दिने क्रममा बोल्दै प्रधानमन्त्री ओलीले संविधान संशोधनको विषय सबैको साझा विषय भएको बताएका हुन् ।
उनले यो विषय साझा सवाल भएकाले साझा ढंगले नै समाधान गरिने बताए । उनले संविधान कार्यान्वयनको ८ वर्षको अनुभव र देशको आवश्यकताका आधारमा संविधान संशोधन हुने बताए ।
उनले देश र जनताको हितको पक्षमा, विकास र समृद्धिको पक्षमा हुनेगरी संविधान संशोधन गरिने स्पष्ट पारे ।
उनले भने– ‘संविधान संशोधन हामीले ८ वर्षसम्म यसको कार्यान्वयनमा गरेको अनुभव र देशको आवश्यकताको आधारमा गरिने हो । देशको आवश्यकता भन्नाले देशको हितको पक्षमा, जनता, विकास, सुशासन यसको पक्षमा । देशलाई आर्थिक, सुशासन, समृद्धि, समानताको पक्षमा अगाडी बढाउनु जे आवश्यक पर्छ, त्यो गर्ने हो । यसमा आँट र नआँट भन्ने प्रश्न रहदैन । यसमा हामी कसैले आँट गर्ने कसैले आँट गर्छ गर्दैन भनेर हेर्ने होइन । आँट गर्नुपरे सबैले गरौँला । आँट गर्न जरुरी नपरे सबैले नगरौँला । यसमा कसैले आँट देखाउने, कसैले हेर्ने किन गर्नुपरेको छ र ? यो साझा सवाल हो । साझा ढङ्गले समाधान गरौँला ।’
प्रधानमन्त्री ओलीले आवश्यकताको आधारमा संविधान संशोधनको आँट सबैले गर्नुपर्ने बताए ।
मकालु खबर
