माओवादी केन्द्रलक्षित सांसद बास्कोटाको टिप्पणी : सत्ताबाट हट्दाको पीडा नपोखौँ

काठमाडौँ । सत्तारुढ नेकपा (एमाले) सांसद गोकुल बास्कोटाले नेकपा (माओवादी केन्द्र) लाई सत्ताबाट हट्नुपर्दाको पीडा नओकल्न आग्रह गरेका छन् ।

संसदमा सरकारविरुद्ध माओवादी केन्द्रका सांसदहरूको अभिव्यक्ति आउन थालेपछि उनले मंगलवार बसेको प्रतिनिधि सभा बैठकमा सो कुरा बताएका हुन् ।

सांसद बास्कोटाले मुलुकलाई निकास दिन दुई ठूला दल काँग्रेस र एमालेले नयाँ सत्तासमिकरण बनाएको उल्लेख गर्दै त्यसको विरोध गरिरहन आवश्यक नभएको बताए । उनले सत्तारुढ गठबन्धन मुलुकको आवश्यकताले बनाएको उल्लेख गर्दै यो कसै विरुद्ध लक्षित नरहेको दाबी समेत गरे ।

सांसद बास्कोटाले साना दलहरूले सत्तामा मरिहत्ते गर्दा मुलुकमा राजनीतिक स्थिरता कायम हुन नसकेको विगतबाट सबैले पाठ सिकेर अघि बढ्नुपर्ने बताए ।

उनले भने ‘दुई वटा ठूला दल मिलेका छन् । ती राजनीतिक रुपमा मिल्दैनन्, सैद्धान्तिक रुपमा मिल्दैनन् । कार्यक्रमको रुपमा मिल्दैनन् । मुलुकलाई निकास दिन मिल्छन् । इतिहासमा पनि मिलेका थिए, आज पनि मिल्छन् । भोली पनि मिल्छन । यति कुरा हो–मुलुकका आवश्यकता अनुसार कसैका विरुद्ध यो होइन । आआफ्नो सामर्थ्यमा चलौँ । अब यो हिजोको पीडा मात्रै बोकेर नहिँडौँ ।’

सांसद बास्कोटाले विकास, निर्माणको काममा ध्यान दिनुपर्ने बेलामा सत्तापक्ष र प्रतिपक्षबीच संसदमा आरोप÷प्रत्यारोप हुनु शोभनीय नभएको पनि बताए ।