सांसद पार्कीको प्रश्न– दलितहरूलाई यो सरकारले कहिले लालपुर्जा दिन्छ ?
मकालु खबर
काठमाडौँ । राष्ट्रिय सभा सदस्य जगतबहादुर पार्कीले युवाहरूलाई रोजगारी दिने कुरालाई सरकारले प्राथमिकता दिनुपर्ने बताएका छन् ।
आइतबार राष्ट्रिय सभा बैठकमा आगामी आर्थिक वर्ष २०८१/८२ का लागि विनियोजन विधेयकका सिद्धान्त र प्राथमिकतामाथि छलफल गर्दै राष्ट्रिय सभा सदस्य पार्कीले युवाहरूलाई रोजगारी दिने विषयलाई मुख्य रुपमा ध्यान दिनुपर्ने बताएका हुन् ।
उनले संविधानले सबैलाई रोजगारीको हक हुने कुरा उल्लेख गरेपनि विधेयकको सिद्धान्त र प्राथमिकतामा सो अनुरूप प्राथमिकतामा नपारिएको बताएका हुन् ।
उनले भूमिहीन दलितहरूलाई भूमि उपलब्ध गराउनुपर्ने र महिला, थारु, मधेसी र पिछडिएको क्षेत्रको समस्या सम्बोधन गर्नेगरी बजेट आउनुपर्ने बताए ।
उनले भने ‘अहिले हाम्रो ४० लाख युवाहरू बिदेसिएका छन् । रोजगार नपाएर । खाडी मुलुकमा उनीहरु रोजगारी खोज्न बाध्य छन् । हाम्रो संविधानमा प्रष्ट व्यवस्था छ, नेपालका हरेक मान्छेहरूलाई रोजगारीको हक हुनेछ भनेर लेखिएको छ । त्यो विषयमा उनीहरूलाई कसरी रोजगारी दिने भन्ने कुराको प्राथमिकिकरण भएन । हाम्रो समस्या त त्यो हो नि । ४० लाख दलितहरूमा ४० प्रतिशत दलितहरू भूमिहीन छन् । ती ४० प्रतिशत दलितहरूलाई यो सरकारले कहिले लालपुर्जा दिन्छ ? कहिले भूमि उपलब्ध गराउँछ ? त्यो प्राथमिकतामा पर्छ कि पर्दैन ? त्यो कुरा प्राथमिकतामा परोस् । म के कुरा आग्रह गर्न चाहन्छु भने महिला, दलित, थारु, मधेसीहरू र पिछडिएको क्षेत्रको सम्बन्धमा एउटा अलग्गै च्याप्टरमा समावेश गरियोस् । उनीहरूको समस्याको अहिलेको अर्थमन्त्रीले सम्बोधन गर्नुपर्छ भन्ने लागेको छ ।’
आगामी बजेटले आर्थिक, सामाजिक र राजनीतिक क्षेत्रमा देखिएका समस्याहरूलाई समाधान गर्नुपर्ने बताए ।
मकालु खबर
