गठबन्धनमा कसरी हुँदैछ सीट बाँडफाँट ?

काठमाडौं । राष्ट्रियसभा निर्वाचनको सिट बाँडफाँडमा सहमति गर्न गठबन्धन दलको बैठक बस्दैछ । प्रधानमन्त्री निवास बालुवाटारमा शनिबार रातिसम्म बसेको बैठकमा सहमति नभएपछि आज फेरि बैठक बस्न लागेको हो ।

आज बैठक बस्ने बताइएको भए पनि समय तोकिएको छैन । राष्ट्रियसभामा रिक्त हुने २० मध्ये १९ सदस्य चयन गर्न आगामी माघ ११ गते चुनाव हुँदै छ । र यसका लागि पुस २३ गते मनोनयन दर्ता गर्ने तालिका रहेको छ ।

सत्ता गठबन्धनमा ७ दल सहभागी भए पनि राष्ट्रियसभाको चुनावमा भने चार दलबीच गठबन्धन हुने देखिएको छ । चार दलमध्ये नेपाली कांग्रेसले १०, माओवादी केन्द्रले ७ र एकीकृत समाजवादी र जसपाले ३-३ सदस्यमा दाबी पेस गरेका छन् ।

तर गठबन्धनमा कांग्रेसलाई ९, माओवादी केन्द्रलाई ६ र एकीकृत समाजवादी र जसपाले २-२ सदस्य लिएर भागबन्डा मिलाउने आन्तरिक तयारी भएको बुझिएको छ । यसअघि शनिबार बिहान बसेको गठबन्धन दलका नेताहरूको बैठकले विपक्षी एमालेसँग सहमति हुने सम्भावना टरेको भन्दै गठबन्धन दलबीचमा मात्रै सहकार्य गर्ने निर्णय गरेको थियो ।

विपक्षी एमालेले ६ सिट पाउनुपर्ने दाबी गरेको थियो । गठबन्धनमा आबद्ध कांग्रेस र माओवादी केन्द्र संक्रमणकालीन न्यायसम्बन्धी विधेयक संसद्‌बाट पारित गर्न सघाउने सर्तमा एमालेलाई ६ सिट दिन सकारात्मक बनेका थिए । तर अन्य दल सहमत नभएपछि एमालेसँगको सहकार्य नहुने भएको हो ।