एमालेको चियापान कार्यक्रममा प्रधानमन्त्री लगायत शीर्ष नेताहरूको बाक्लो उपस्थिति (तस्बिरहरू)
मकालु खबर
काठमाडौँ । प्रमुख प्रतिपक्ष दल नेकपा (एमाले) ले दसैँ, तिहारलगायतका चाडपर्वको अवसर पारेर शुभकामना आदानप्रदान तथा चियापान कार्यक्रम आयोजना गरेको छ ।
पार्टी अध्यक्ष एवं पूर्वप्रधानमन्त्री केपी शर्मा ओलीको निमन्त्रणामा बुधवार पार्टी केन्दिय कार्यालय च्यासलमा आयोजना गरिएको थियो ।
सो कार्यक्रममा प्रधानमन्त्री दाहाल अपराह्न पौने ३ बजेतिर सहभागी भएका थिए ।
चियापान कार्यक्रममा प्रतिनिधि सभाका सभामुख देवराज घिमिरे, राष्ट्रिय सभा अध्यक्ष गणेशप्रसाद तिमिल्सिना, नेपाली काँग्रेसका सभापति एवं पूर्वप्रधानमन्त्री शेरबहादुर देउवा, नेकपा (एकीकृत समाजवादि ) का सम्मानित नेता एवं पूर्वप्रधानमन्त्री झलनाथ खनाल, नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराई, मन्त्रीपरिषद्का पूर्वअध्यक्ष खिलराज रेग्मी, राष्ट्रिय स्वतन्त्र पार्टीका सभापति रवि लामिछाने पनि उपस्थित भएका थिए ।
नेपाल कम्युनिष्ट पार्टी (नेकपा) का महासचिव नेत्रविक्रम चन्द विप्लव, नेकपा मालेका महासचिव सिपी मैनाली, पूर्वसभामुख दमननाथ ढुंगाना, विभिन्न राजनीतिक दलका नेताहरू, नेपालस्थित कूटनीतिक नियोगका प्रमुख तथा प्रतिनिधिहरू, नेपाल सरकारका उच्चपदस्थ कर्मचारीहरूसहितको बाक्लो उपस्थिति रहेको थियो ।
एमालेले बडा दसैँ लगत्तै हरेक वर्ष चियापान कार्यक्रम गर्दै आएको छ ।
यस वर्ष (हिजो) कार्तिक १४ गते आयोजना गरिएको सो कार्यक्रम संयुक्त राष्ट्र संघका महासचिव एन्टोनियो गुटेरेसको नेपाल भ्रमणका कारण एक दिन पछि (आज) सारिएको हो ।
चियापान कार्यक्रममा एमालेका नेता, कार्यकर्ताहरूको घुइँचो लागेको छ । अध्यक्ष ओलीलाई भेट्न ज्येष्ठ नागरिकहरू पनि उत्साहका साथ कार्यक्रममा सहभागी भएका छन् ।
मकालु खबर
