एसिया कप : भारत र पाकिस्तानसँग भिड्ने नेपाली टिम घोषणा
काठमाडौँ । नेपाल क्रिकेट संघ (क्यान) ले एसिया कप २०२३ का लागि रोहित पौडेलको कप्तानीमा १७ सदस्यीय नेपाली राष्ट्रिय टिम घोषणा गरेको छ ।
एक दिवसीय फर्म्याटमा हुने एसिया कपमा नेपाल समूह ‘ए’ मा छ । समूहमा नेपालले भारत र पाकिस्तानसँग भिड्नेछ ।
एसिया कपअघि नेपालले अन्तिम तयारी पाकिस्तानको कराँचीमा गर्नेछ । एक साता पाकिस्तानमा तयारीका दौरान नेपालले स्थानीय टिमसँग अभ्यास खेल खेल्नेछ ।
एसिया कपको आयोजक पाकिस्तान भए पनि अधिकांश खेलहरू श्रीलंकामा हुँदैछन् । भारतले पाकिस्तानमा गएर खेल्न अस्वीकार गरेपछि खेल श्रीलंकामा हुन लागेका हुन् ।
नेपाली टिम पाकिस्तानसँग खेल्नुअघि प्रशिक्षणका लागि ५ भदौमा कराँचीमा पुग्नेछ ।
एसिया कपको पहिलो पहिलो खेल नेपालले भदौ १३ मा पाकिस्तानसँग खेल्नेछ ।
नेपाल समूह चरणको दोस्रो खेल खेल्न भने पाकिस्तानबाट श्रीलंका पुग्न पर्नेछ । नेपालले दोस्रो खेलमा भारतविरुद्ध भदौ १८ मा श्रीलंकामा खेल्नेछ ।
तीन-तीन टिमको समूहबाट शीर्ष दुई दुई टिम गरी चार टिमले सुपर फोर खेल्नेछन् । सुपर फोर पछि एसिया कपको फाइनल भदौ ३१ मा हुनेछ ।
नेपाली टिम
रोहित पौडेल (कप्तान), आसिफ शेख, कुशल भुर्तेल, ललित राजवंशी, भीम सार्की, कुशल मल्ल, दीपेन्द्रसिंह ऐरी, सन्दीप लामिछाने, श्याम ढकाल, करण केसी, गुल्सन झा, आरिफ शेख, सोमपाल कामी, प्रतिश जिसी, किशोर महतो, सन्दीप जोरा, अर्जुन साउद ।