सुनवाइ समितिमा प्रस्तावित प्रधानन्यायाधीश कार्की, आजै निर्णयमा पुग्ने
मकालु खबर
काठमाडौँ । प्रस्तावित प्रधानन्यायाधीशमा सर्वोच्च अदालतका वरिष्ठ न्यायाधीश हरिकृष्ण कार्कीको संसदीय सुनुवाइ हुँदैछ । सुनुवाइका लागि संसदीय सुनुवाइ समितिले कार्कीलाई आज बिहान ८ बजे सिंहदरबार आमन्त्रण गरेको छ ।
लेखा समितिको हलमा कार्कीले प्रधानन्यायाधीश नियुक्त भएपछिका अवधारणा र कार्ययोजना राख्ने संसद् सचिवालयका प्रवक्ता एकराम गिरीले जानकारी दिए । ‘उहाँको पहिला प्रस्तुति रहन्छ । त्यसपछि माननीय ज्यूले प्रश्न राख्नुहुन्छ । सुनुवाइ सकिएपछि निर्णय हुन्छ,’ उनले भने ।
बिहान ११ बजे प्रतिनिधिसभा बैठक भएकाले बिहीबार नै सुनुवाइ सक्न समयको दबाब समितिलाई छ । ‘उहाँको कार्ययोजना प्रस्तुत गर्न आमन्त्रण गरेका छौँ । सम्भव भएसम्म आजै निर्णयमा पुग्ने प्रयास गर्छौँ,’ समिति सदस्य ज्ञानेन्द्रबहादुर कार्कीले भने ।
सुनुवाइअघि समितिले उजुरीकर्तासँग छलफल गरेको छ । उनीविरुद्ध परेका २९ वटा उजुरीका बारेमा समितिले उजुरीकर्तासँग हिजो छलफल गरेको थियो ।
मकालु खबर
