बैंकिङ कसुर मुद्दामा एक करोड जरिवाना गरिएका घिसिङ ६ महिनापछि पक्राउ

काठमाडौँ । प्रहरीले उच्च अदालत पाटनबाट रु. एक करोड दुई लाख ५० हजार जरिवाना गरिएका एकजनालाई पक्राउ गरेको छ ।

प्रहरीको केन्द्रीय अनुसन्धान ब्यूरो (सिआइबी)ले २०७८ पुस २७ गते उच्च अदालत पाटनबाट बैंकिङ कसुर मुद्दामा जरिवाना तोकेपछि फरार रामेछापको सुनापति गाउँपालिका घर भई हाल काठमाडौँको गोकर्णेश्वर बस्ने ४३ वर्षीय विनोद घिसिङलाई आज पक्राउ गरेको हो ।

ब्यूरोका प्रवक्ता, प्रहरी उपरीक्षक श्यामकुमार महतोले उच्च अदालत पाटनले बैंकिङ कसुर मुद्दामा उक्त रकम जरिवाना तथा २१ दिन कैद सजाय ठहर गरेपछि फरार घिसिङलाई आज जोरपाटीबाट पक्राउ गरिएको जानकारी दिएका छन् । घिसिङले आफ्नो मेगा बैंक लिमिटेड बौद्ध शाखाको खातामा पर्याप्त रकम नभएको जानी–जानी पीडितलाई झुक्याएर ठगी गरेपछि अदालतले उक्त फैसला गरेको हो ।

फैसला कार्यान्वयनका लागि घिसिङलाई आजै (असार १४ गते, मंगलबार) जिल्ला अदालत काठमाडौँमा पेश गरिएको प्रवक्ता महतोले बताए ।

प्रतिक्रिया

Leave a Reply

Your email address will not be published.