झापामा १० महिनामा बलात्कार घटनामा ८६ अभियुक्त पक्राउ

काठमाडौँ । विगत १० महिनामा झापामा बलात्कारका १०६ घटनामा प्रहरीले ८६ अभियुक्तलाई पक्राउ गरी कानुनी कारबाहीको दायरामा ल्याएको छ ।

जिल्ला प्रहरी कार्यालय झापाको तथ्याङ्कानुसार आर्थिक वर्ष २०७८-०७९ को १० महिनामा सबैभन्दा बढी जबर्जस्तीकरणीका ७२ जाहेरी परेका छन् । ती घटनामा ५६ अभियुक्त पक्राउ परिसकेका छन् । सोही अवधिमा बाल यौन दुराचारका १९ र जबर्जस्ती करणी उद्योगका १३ घटनाका उजुरी परेका छन् । बाल यौन दुराचारका १७ र जबर्जस्तीकरणी उद्योगका १० अभियुक्त पक्राउ परेको जिल्ला प्रहरी कार्यालयका प्रवक्ता वसन्त पाठकले जानकारी दिए ।

बलात्कृत हुनेमा ४ वर्षीया बालिकादेखि ६० वर्षीया वृद्धासमेत छन् । पछिल्लो समय बाल यौन दुराचारका घटना बढेका छन् । अधिकांश बलात्कारका घटनामा प्रायः परिवार, नातागोता, शिक्षक र छरछिमेकी अभियुक्त पाइएको पाठकले बताए । “अधिकांश घटना नजिकका आफन्तबाट भएका देखिन्छन्”, उनले भने ।

यस्ता आपराधिक क्रियाकलापमा पढेलेखेका र समाजमा पहिचान बनाएका व्यक्तिको समेत संलग्नता पाइएको छ । उजुरी भएमध्येका बलात्कारका घटनाका २० अभियुक्त अझै फरार छन् ।

प्रतिक्रिया

Leave a Reply

Your email address will not be published.