रातो मत्स्येन्द्रनाथ यात्राकाे तयारी (फाेटाेफिचर)
काठमाडाैँ । वैशाख २१ गतेदेखि सुरु हुने रातो मत्स्येन्द्रनाथको रथ यात्राका लागि रथ निर्माण भइरहेको छ ।
वैशाख कृष्ण प्रतिपदाका दिन रातो मत्स्येन्द्रनाथको महास्नान गरेपछि रथ बनाउने काम भइरहेको हो ।
वैशाख शुक्ल प्रतिपदामा मत्स्येन्द्रनाथलाई रथारोहण गर्नुपर्ने भएकाले रथ बनाउने कामलाई तिव्रता दिएको गुठी संस्थानले जनाएको छ । रथ विभिन्न किसिमका काठ तथा बेतको सहायताले बनाउने गरिन्छ ।
काठकै चुकुल राखी बेतको डोरीले बाँधेर रथ निर्माण गर्ने परम्परा छ । पाटनको तःबहालबाट मत्स्येन्द्रनाथको मूर्तिलाई खटमा राखी सांस्कृतिक बाजागाजाका साथ जात्रा गर्दै पुल्चोकमा निर्मित ३२ हात अग्लो रथमा आरोहण गराइने चलन छ ।
मत्स्येन्द्रनाथको मूर्ति रथारोहण गरिएको चौथो दिन रथयात्रा गर्ने परम्परा छ । आमाको मुख हेर्ने दिनको भोलिपल्ट रथारोहण गरिएको रातो मत्स्येन्द्रनाथको रथ पुल्चोकबाट तानेर पाटनका विभिन्न स्थानमा पुर्याइने गरिन्छ ।
किंवदन्तीअनुसार १२ वर्षसम्म पानी नपरी अनिकाल लागेपछि राजा नरेन्द्रदेव, तान्त्रिक बन्धुदत्त आचाजु, ललित ज्यापु तथा कर्कोटक नागराजासमेत भारतको कामरूप कामाख्या गई ‘वुंगद्य’ अर्थात् रातो मत्स्येन्द्रनाथलाई काठमाडौँ उपत्यकामा ल्याएका थिए ।
आफ्ना गुरु मत्स्येन्द्रनाथ देखेपश्चात् गोरखनाथ गुरुको दर्शनका लागि जाने क्रममा नव नाग मुक्त भई वर्षा भएको र सहकाल लागेको विश्वास छ । यही किंवदन्तीका आधारमा हालसम्म पनि मत्स्येन्द्रनाथको मूर्तिलाई रथयात्रा गर्ने परम्परा छ ।
