वैज्ञानिक समाजवादी कम्युनिष्ट पार्टीको महासचिवमा आहुति, बन्याे ‘भिटो अधिकार’ सहितको प्रबुद्ध समिति

काठमाडाैँ । वैज्ञानिक समाजवादी कम्युनिष्ट पार्टीको राष्ट्रिय भेलाले विश्वभक्त दुलाल ‘आहुति’ लाई महासचिवमा चयन गरेकाे छ । चैत १७ गतेदेखि काठमाडाैँमा चलिरहेकाे पहिलाे राष्ट्रिय सम्मेलनले आहुतिलाई महासचिवमा चयन गरेकाे हाे ।

सम्मेलनमा आहुतिले राजनीतिक प्रतिवेदन प्रस्तुत गरेका थिए । यस्तै जागृत रायमाझीले विधान प्रस्ताव र धनकुमारी सुनारले आर्थिक प्रतिवेदन पेश गरेका थिए । ती प्रतिवेदनमाथिहरूमाथि ९ वटा समूह बनाइ छलफल भइरहेकाे छ ।

१९ गतेको बैठकमा केन्द्रीय समिति सदस्यको प्यानल प्रस्तुत गरिएको थियो । केन्द्रीय समितिमा ९९ जना सदस्य रहने व्यवस्था छ । एकतिहाइ सचिवालय सदस्य हुन्छन् । एक जना प्रवक्ता हुनेछन् । प्रवक्तापछि तोकिने छ। केन्द्रीय समितिमा ४० प्रतिशत महिला अनिवार्य गरिएको छ । करिब ६५ प्रतिशत युवाहरूकाे सहभागिता रहेको नेताहरूले बताएका छन् ।

भेलाले ९० वर्षीय नन्दन अर्यालको संयोजकत्वमा पाँच सदस्यीय प्रबुद्ध समितिसमेत गठन गरेको छ। अहिले समितिका अन्य सदस्यहरूमा डा शिवशंकर यादव, हरिदेव ठाकुर र रोहित हिङनाम निर्वाचित भएका छन् । थप सदस्य पछि थपिने पार्टीले जनाएकाे छ ।

एक सदस्यकाअनुसार प्रबुद्ध समितिलाई ‘भिटाे अधिकार’ पनि हुनेछ । ‘यसले केन्द्रीय समिति बराबरकै हैसियत राख्छ,’ उनले भनेका छन्, ‘केन्द्रीय समितिले गरेका कतिपय निर्णय प्रबुद्ध समितिलाई बेठीक लाग्यो भने त्यसलाई उसले भिटो प्रयोग गरेर कार्यान्वयनमा रोक लगाउन सक्छ ।’