उडिरहेको हेलिकोप्टरमै जन्मियो बच्चा
सुर्खेत । सुत्केरी हुन नसकेपछि नेपाली सेनाले उद्वार गरेर मुगु जिल्लाबाट प्रदेश अस्पताल ल्याउँदै गर्दा हेलिकोप्टरमै बच्चा जन्मिएको छ ।
कर्णाली प्रदेशको राजधानी वीरेन्द्रनगर सुर्खेतमा रहेको नेपाली सेनाको पश्चिम कमाण्ड हेडक्वाटर नेवारेका अनुसार मुगुकी एक सुत्केरी महिलाको मंगलवार उद्धार गरिएको हो ।
उक्त वेशको कमाण्ड गर्दै आएका पाइलट प्रमुख सेनानी रचन श्रेष्ठले मुगुको खत्याड गाउँपालिका–४ की २० वर्षीय धनलक्ष्मी रावललाई सुत्केरी व्यथाले च्यापेको १८ घण्टाभन्दा बढी उद्धार गरिएको जानकारी दिए ।
नेपाली सेनाका अनुसार मुगुबाट सुत्केरी रावलको मुगुबाट उद्वार गरेर फर्किने क्रममा दैलेख जिल्लाको आकाशमा आइरहेको बेला बच्चा जन्मिएको जनाएको छ ।
नेपाली सेनाले आमा र शिशु दुवैलाई बोकेर ल्याएको हेलिकोप्टर प्रदेश अस्पताल कालागाउँमा ल्याण्ड गरेको थियो ।
यता, कर्णाली प्रदेश अस्पतालका अनुसार उद्दार गरिएका आमा र शिशुको स्वास्थ्य अवस्था सामान्य रहेको छ भने अस्पतालले शुरूमा आकस्मिक कक्षमा भर्ना गरिएपनि अहिले बच्चा र आमाको अवस्था धेरै राम्रोहुँदा वार्डमा सारिएको बताएको छ ।
महिला बालबालिका तथा ज्येष्ठ नागरिक मन्त्रालयले राष्ट्रपति महिला उत्थान कार्यक्रम मार्फत दुर्गम हिमाली तथा पहाडी क्षेत्रमा ज्यान जाेखिममा रहेका गर्भवती तथा सुत्केरी महिलालाई निःशुल्क हवाई उद्धार गर्दै आएकाे छ।
