बझाङमा पहिरोमा बेपत्ता भएका २३ मध्ये २ को शव फेला

धनगढी । बझाङमा पहिरोमा परेर बेपत्ता भएका २३ जनामध्ये दुई जनाको शव भेटिएको छ ।

जिल्लाको थलारा गाउँपालिका-४ डिक्लाका दुई बालकको शव भेटिएको प्रहरीले जनाउको छ । जसमध्ये पहिरोमा परी बेपत्ता भएका नरे पार्कीका सात वर्षीय छोरा आयुष पार्कीको पहिचान भएको छ भने अर्को एक बच्चाको पहिचान खुल्न बाँकी छ ।

मौसम अनुकूल भएपछि पहिरोमा पुरिएकाहरूको उद्धार तथा खोजबिनका लागि नेपाली सेना र सशस्त्र प्रहरीको टोली हेलिकोप्टरमार्फत घटनास्थलमा खटिइसकेको छ ।

थलारा गाउँपालिका-४ डिक्लामा मंगलबार बिहान पहिरो जाँदा २३ जना बेपत्ता भएका थिए ।

लगातारको वर्षाका कारण मंगलबार बिहान ४ बजे थलारा गाउँपालिका- ४ डिक्लामा पहिरो जाँदा एकै परिवारका १८ र अर्को परिवारका ५ गरी २३ जना बेपत्ता भएका थिए ।

पहिरोले सात घर पुरिएका छन् ।