मन्त्रिपरिषद्ले पूर्णता पाउँदै, मनाङ्गेलाई साबिककै मन्त्रालय
मकालु खबर
पोखरा । गण्डकी प्रदेश सरकारले आइतबार (भोलि) सम्ममा मन्त्रिपरिषद्लाई पूर्णता दिने भएको छ । बिनाविभागीय मन्त्री तथा सरकारका प्रवक्ता कुमार खड्काकाअनुसार भोलिसम्ममा मन्त्रिपरिषद्लाई पूर्णता दिनेगरी तयारी भइरहेको छ । खड्काले मकालुखबरसँग भने— ‘मुख्यमन्त्रीज्यूले भोलिसम्ममा मन्त्रिपरिषद्लाई पूर्णता दिने तयारी थाल्नुभएको छ । त्यही कामका लागि हामी जुटिरहेका छौँ । सबै दलका नेतासँग आवश्यक सम्वाद बढाएका छौँ ।’
- छुट्यो कि ?
मन्त्रीका आकाङ्क्षी धेरै, एउटै मन्त्रालयमा धेरैको दाबी
मनाङ्गे–प्रचण्डबीच भेट, के भयो कुराकानी ?
मन्त्रालय बाँडफाँट : सीमित मन्त्रालय, आकांक्षी धेरै
तत्कालीन मुख्यमन्त्री पृथ्वीसुब्बा गुरुङले सदनबाट विश्वासको मत लिन नसकेपछि मुख्यमन्त्री बनेका कांग्रेस संसदीय दलका नेता कृष्णचन्द्र नेपाली पोखरेलले सदनबाट विश्वासको मत लिइसकेका छन् । गत असार ३ गते नै विश्वासको मत लिइसकेका मुख्यमन्त्री पोखरेलले मन्त्रिपरिषद्लाई पूर्णता दिन भने सकेका छैनन् । कांग्रेसकै खड्कासहित माओवादी र जसपाका एक/एकजना र स्वतन्त्र सांसद दीपक मनाङ्गे उर्फ राजीव गुरुङले भने गत जेठ २९ गते नै बिनाविभागीय मन्त्रीको रुपमा शपथ लिइसकेका छन् । ‘अब भने मन्त्रालय बाँडफाँटको काम चाँडै टुङ्गिन्छ’, खड्काले भनेका छन् ।
मुख्यमन्त्री पोखरेलले शुक्रबार (हिजो) नै मन्त्रालय बाँडफाँटको काम टुङ्ग्याएर मन्त्रिपरिषद्लाई पूर्णता दिने तयारी गरेका थिए । तर, समय अपुगसँगै दलहरुसँग कुरा नमिनलेपछि मुख्यमन्त्री पोखरेल रोकिएका थिए । एक कांग्रेस नेताले भने— ‘केन्द्रसँग पनि यो बारेमा कुराकानी भइसकेको छ र त्यहाँबाट एक खाले डिसिजन आएको छ । अब आज वा भोलिभित्र चाहिँ मन्त्रालय बाँडफाँटको काम सकिन्छ ।’
अहिलेसम्म भएको सहमतिअनुसार जसपाका हरिशरण आचार्यले ऊर्जा, जलस्रोत तथा सिचाईं मन्त्रालयको जिम्मेवारी पाउँदैछन् । यद्यपि उनको दाबी अर्थ मन्त्रालय थियो । मकालुखबरसँगको कुराकानीको क्रममा आचार्यले भने— ‘मुख्यमन्त्रीज्यूसँग सहमति भएअनुसार भयो भने हामी सरकारमा गइहाल्छौँ । तर, त्यो छाटकाँट देखिँदैन । हामी सरकारमा नजान पनि सक्छौँ ।’
यस्तै नेकपा माओवादी केन्द्रका मधुमाया अधिकारीले स्वास्थ्य तथा जनसंख्याको मन्त्रालयको जिम्मेवारी पाउने भएका छन् भने कांग्रेसकै खड्काले सामाजिक विकास मन्त्रालय पाउने भएका छन् ।
यता मनाङ्गेले साबिककै युवा तथा खेलकुद मन्त्रालयको जिम्मेवारी पाउनेछन् । एमाले नेतृत्वको सरकारमा पनि मनाङ्गेले सोही मन्त्रालय पाएका थिए । अहिले कांग्रेस नेतृत्वको गठबन्धन सरकार बनाउन निर्णायक भूमिका खेलेका मनाङेले पनि यसअघि भौतिक पूर्वाधार विकास मन्त्रालयमा दाबी गरेका थिए ।
मकालु खबर
