‘मोटी भयौ’ भन्नेलाई प्रमिलाको जवाफ
काठमाडौं । व्यक्तिको शारीरिक बनावटका विषयमा टिप्पणी गर्नु ‘बडी सेमिङ’ गलत हो । कतिपय देशमा त यसलाई अपराध नै मानिन्छ । कसैको मोटोपन मजाकको विषय बन्छ भने कसैको दुब्लोपनबारे खिसिट्युरी गर्ने क्रम भने समाजमा छँदैछ ।
लामो नाक, कालो छाला, घुंग्रेको कपाल, अग्लो वा होचो शरीरलगायत धेरै कुरालाई सुन्दरतासँग जोडेर हेर्ने गरिन्छ । अझभन्दा त मानक नै जस्तो बनाएर विभेद गर्ने गरिन्छ ।
‘कस्तो मोटाको, अब कसले बिहे गर्छ ? खाने बेलामा बाहिर निकाल्छन् कि के हो ? छि ! कस्ती काली, यस्तो नराम्रो अनुहार छ बिक्न गाह्रो होला ।’ यस्ता टिप्पणीहरु प्रशस्तै सुनिन्छन् ।
अझ मनोरञ्जनको क्षेत्रमा त महिलाको ‘शारीरिक सुन्दरता’लाई बढी नै ‘महत्त्व’ दिने गरिन्छ । केही समयअघिसम्म त नायिकाको विवाहलाई करियरको अन्त्य भन्ने गरिन्थ्यो । आकर्षक देखिन शरीर पातलो हुने पर्ने, छिनेको कम्मर हुनुपर्ने, अनुहारमा दाग धब्बा हुन नहुनेजस्ता स्थापित धारणा अझै पनि छँदैछन् ।
यही विषय रङ्गकर्मी प्रमीला खनाललाई पनि बिझाएको छ । उनलाई अरूको टिप्पणी सुनेर आफ्नो मोटोपनलाई अपराध झैँ लाग्ने गरेको छ । फेसबुकमा उनले लेखेकी छन् :
अझ ताज्जुब लाग्ने कुरा ‘पहिला राम्री थियौ‚ अहिले मोटाएछौ । ‘ यसको आशय के बुझ्नु ? संसारमा पातला र दुब्लाहरू मात्र राम्रा हुन्छन् ,हो ? कि मोटी केटीहरू राम्रा र सुन्दरी हुँदैनन् ? यस्तो टीकाटिप्पणीले मनोबलमा कति असर पुर्याउला ?
तुलना नै गर्ने हो भने मोटी केटीहरू विशेष राम्रा र विशेष प्रतिभाशाली हुन्छन्।।
(यो लेखबाट कसैलाई ठेस पुग्न गएमा क्षमा चाहन्छु)
‘पहिला त राम्री थियौ, अहिले मोटाएछौ’ भन्नु मोटोपन भएका व्यक्तिमाथि गरिने विभेदको एक उदाहरण हो । तर शारीरिक बनावटको आधारमा गरिएको विभेदको विषयमा लेख्दै गर्दा प्रमीला स्वयंले पनि विभेद भने गरेकी छन् ।
उनी लेख्छिन्, ‘तुलना नै गर्ने हो भने मोटी केटीहरू विशेष राम्रा र विशेष प्रतिभाशाली हुन्छन्।’ उनको अभिव्यक्तिमा पातलो व्यक्तिमाथिको तुलना र विभेद देखिन्छ ।
आफूमाथि भएका विभेदबारे प्रश्न उठाउनु र असहमति जनाउनु जायज हो । तर त्यसो गर्दा अरुलाई भने विभेद गर्नुलाई राम्रो मान्न सकिँदैन ।
आखिर सबै मानिस आफैंमा सुन्दर हुन्छन्‚ होइन र ?