‘मन्दिरको क्षमा पूजाले दण्डबाट मुक्ति पाइँदैन’
काठमाडौँ । नेपाली कांग्रेसका केन्द्रीय सदस्य डा. शेखर कोइरालाले दण्डबाट मुक्ति पाउन मन्दिरको क्षमा पूजाबाट सम्भव नभएको बताएका छन् । सोमबार शान्तिपूर्ण प्रदर्शनका क्रममा नागरिक समाजमाथिको दमनका विषयमा प्रतिक्रिया दिँदै नेता कोइरालाले सोमबारको बर्बरताका लागि नागरिक समाजसँग क्षमा माग्न आग्रहसमेत गरेका छन् ।
ट्वीट गर्दै नेता काेइरालाले भनेका छन् ‘देशको माटो निधारमा लगाएर प्रतिगमनका विरुद्धमा शान्तिपूर्ण प्रदर्शनमा रहेका नागरिक समाजमाथि बर्बरताको निन्दा र भत्र्सना जति गरे पनि पुग्दैन,’ नेता कोइरालाले भने, ‘त्यो अपराधको दण्डबाट मुक्ति न त मन्दिरमा गरिने क्षमा पूजाबाट सम्भव छ न त कम्युनिस्ट शब्दकोशको आत्मालोचनाबाट नै ।’
प्रधानमन्त्री केपी शर्मा ओलीले पशुपतिनाथ मन्दिरमा क्षमा पूजा गरेकै दिन शान्तिपूर्ण आन्दोलन गरिरहेका नागरिक अभियन्ताविरुद्ध प्रहरीले पानीको फोहरा र लाठी बर्साएको थियो ।
देशको माटो निधारमा लगाएर प्रतिगमनका विरुद्धमा शान्तिपुर्ण प्रदर्शन रहेका नागरिक समाज माथि वर्वरताको निन्दा र भत्सर्ना जति गरेपनि पुग्दैन।त्यो अपराधको दण्डबाट मुक्ति न त मन्दिरमा गरिने क्षमा पुजाबाट सम्भव छ न त कम्युनिष्ट शब्दकोषको आत्मालोचनाबाट नै।
सरकार,नागरिक समाजसँग क्षमा माग।— Dr Shekhar Koirala (@Shekharnc) January 26, 2021