कर्णाली स्वास्थ्य विज्ञान प्रतिष्ठान जुम्लामा १५ शय्याको आइसोलेसन वार्ड

चैत्र ९, काठमाडौं । कोरोना भाइरसको रोकथाम तथा नियन्त्रणका लागि कर्णाली स्वास्थ्य विज्ञान प्रतिष्ठान जुम्लाले १५ शैय्याको आइसोलेसन वार्ड  छुट्याएको छ । सरकारले कोरोना भाइरसको उच्च सतर्कता अपनाएसँगै जुम्ला स्थित स्वास्थ्य विज्ञान प्रतिष्ठानले पनि त्यसका लागि १५ शैय्याको आइसोलेशन वार्ड छुट्याएको हो ।   

यस्तै प्रतिष्ठानले कोरोनाका शङ्कास्पद बिरामी राख्न प्रतिष्ठानले १०० जना क्षमताको  क्वारेन्टाइनको व्यवस्था गर्ने तयारी पनि गरेको छ।   

प्रतिष्ठानका अस्पताल निर्देशक डा. मङ्गल रावलले १५ शैय्याको आइसोलेसनसँगै अस्पतालमा छुट्टै फिभर क्लिनिक सञ्चालन गरिएको जानकारी दिएका छन् । 

उनले भने, ‘हामीले डा. धिरज गुरुङको नेतृत्वमा ‘र्‍यापिड रेस्पोन्स’ टोली निर्माण गरेका छौँ, यसले कोरोनाका सम्बन्धमा आउने समस्याको शीघ्र समाधानमा ध्यान पुर्‍याउने छ ।’ 

कोरोनाको रोकथामका लागि जुम्लाका पाँच नाकाको आवागमनमा कडाई गर्ने हेतुले जिल्ला प्रशासन कार्यालय, जिल्ला स्वास्थ्य, रेडक्रस, नेपाली सेना, सशस्त्र प्रहरी, नेपाल प्रहरीसँग आवश्यक समन्वय भइरहेको उनले बताए । कालीकोटको नाग्म, मुगु आउनेजाने बुडु र भूलभुले, डोल्पा र जाजरकोट जोड्ने मणिसाँघु, जुम्ला विमानस्थलको आवागमनमा कडाँ जाँच गर्ने र त्यसका लागि आवश्यक जनशक्ति व्यवस्थापन गर्ने तयारी भइरहेको निर्देशक डा. रावलले बताए । 

अस्पतालको बहिरङ्ग कक्षमा भीडभाड हुन दिइएको छैन ।  उनले पाँच नाकामा बस्ने जनशक्तिलाई तालिम दिने, व्यवस्थापन गर्ने अनुगमन तथा निरीक्षणको व्यवस्थासमेत मिलाइएको जनाए ।   

डा.रावलका अनुसार प्रतिष्ठानले कर्णाली प्रदेश सरकार सामाजिक विकास मन्त्रालयको समन्वयमा हुम्लाको हिल्सा नाकामा हेल्थ डेस्क स्थापना गरी कोरोना जाँच कार्यलाई प्रभावकारी बनाउन एक महिनाका लागि डा. अशोक गौतम नेतृत्वको तीन सदस्यीय टोली पठाएको छ । 

जिल्ला विपद् व्यवस्थापन समितिको आज बसेको बैठकमा सरोकारवालासँग छलफलगरी जुम्लाका प्रमुख नाकाबाट आवश्यक वस्तु भित्र्याएर लक डाउन गर्ने निर्णय भएको जिल्लास्तरीय कार्यान्वयन तथा अनुगमन समिति एवम् जिल्ला प्रशासन कार्यालय जुम्लाका प्रमुख जिल्ला अधिकारी दुर्गा बञ्जाडेले बताइन् । 

उनले भनिन्, ‘हामीले यो प्रकोपसँग जुध्न उच्च तयारी गरेका छौँ, स्थानीय तहका प्रमुख एवम् वडाध्यक्षको समन्वयमा नेपाल खाद्य संस्थान, साल्ट ट्रेडिङलगायतले आवश्यक वस्तु उपलब्ध गर्ने निर्णय भएको छ ।’ 

क्वारेन्टाइनका लागि थप समस्या सम्बोधन गर्न जिल्लाको कुनै विद्यालय छनोट गर्ने तयारी भइरहेकोउनले बताइन् । जिल्ला अधिकारी बञ्जाडेका अनुसार खानेपानी, स्वास्थ्यसहितका आवश्यकता आपूर्तिका लागि सरोकारवाला सबै रहने गरी उपसमिति गठन गरिएको छ । कोरोनाको रोकथामका लागि जिल्लाका राजनैतिक दल, नागरिक समाज, पत्रकार, अधिकारवादीलाई एकजुट भएर लाग्न आग्रह गरेको जनाइएको छ ।