२ रुपैयाँबाट सुरु भएको कर्मचारी कल्याण कोषको पूँजी २ करोड

कात्तिक २९, काठमाडौँ । नेपाल रेडक्रसको कर्मचारी कल्याण कोषले आफ्नो ४० औँ वर्षगाँठ कार्यक्रम तथा वार्षिक साधारण सभा कार्यक्रम सम्पन्न गरेको छ । काठमाडौँको कालिमाटीमा बिहीबार सम्पन्न सधारण्सभाले आगामी आ.वको लागि ११ लाख ६१ हजार साधारणतर्फ तथा अनुमानित २ करोड रुपैँया आपत्कालिन अवस्थामा ऋण सहयोग गर्ने कार्यक्रम तय गरेको छ ।   

विपत्तिको अवस्थामा सहयोग पुर्याउने तथा सामाजिक आर्थिक सहयोगको  लागि २०३६ साल साउनमा नेरेसोका कर्मचारीबीच पारस्परिक सहयोगको लागि बचत अभियान स्वरुप कोषको स्थापना गरिएको थियो  ।   

कार्यक्रममा कल्याणकोषको  स्थापना र विकासमा सहयोग पुर्याउने र उत्प्रेरणात्मक सहभागिता जनाउनेलाई सम्मान गरिएको थियो । सम्मानित हुनेहरुमा पूर्व कार्यकारी निर्देशक तीर्थराज वन्त, पूर्व उपकार्यकारी निर्देशक इन्द्रबहादुर केसी तथा उत्प्रेरणात्मक नृत्यतर्फ रामकृष्ण शर्मा रहेका छन् । 

कोषका सचिव पदमनाथ आचार्यले कार्यक्रममा प्रगति प्रतिवेदन पेश गरेका थिए भने कोषाध्यक्ष केदार बरालले कोषको कारोबार र आय व्यय विवरण प्रस्तुत गरेका थिए ।  कोषका संस्थापक तीर्थराज वन्तले ४० वर्षको ऐतिहासिक घटना चर्चा गरे ।   

नेरेसोका अध्यक्ष संजीव थापाले कोषमा सवै कर्मचारीको अपनत्व हुने गरी अघि वढ्न अनुरोध गर्दै कोषलाई अझ क्रियाशिल बनाई र उत्पादनशीलतातर्फ लैजान सुझाव दिए । महामन्त्री देवरत्न धाख्वाले कार्यक्रमको समुद्घाटन गर्दै नेरेसोले समुदाय, परिवार र व्यक्तिहरुलाई आफ्नो समस्या आफै समाधान गर्ने अवस्थामा पुर्याउन सहयोग गरिरहेको र कोषले पनि कर्मचारीहरुको अभाव, आकस्मिकतामा  सघाऊ पुर्याइरहेको धारणा व्यक्त गरे ।  

कोषका अध्यक्ष डाक्टर प्रकाश कुमार यादवको सभापतित्वमा भएको कार्यक्रममा रेडक्रसको अन्तर्राष्टिय महासंघका प्रतिनिधि प्रदीप मित्तल, नेपाल रेडक्रस सोसाइटीका उपमहामन्त्री हरिप्रसाद न्यौपाने, निमित्त कार्यकारी निर्देशक मनिता राजकर्णिकार, साझेदार सोसाइटीका प्रतिनिधिहरु र रेडक्रस केन्द्रीय कार्यालयमा कार्यरत कर्मचारीहरुको सहभागिता रहेको थियो ।   

२ रुपैँया बाट सुरु भई २ करोडको कोष   

रेडक्रस कर्मचारी कल्याण कोषका सदस्यहरूबीच पारस्परिक सहयोगको आधारमा विपत्तिको अवस्थामा सहयोग पुर्याउने तथा अन्य  अवस्थामा सामाजिक तथा आर्थिक स्थिति सुधारको लागि  कार्यक्रमहरू सञ्चालन गर्ने उद्देश्यले २०३६ साल साउनमा कोषको स्थापना भएको हो ।   

रेडक्रसका सहयोगी कर्मचारीबाट २ रुपैँया र अधिकृतस्तरका कर्मचारीबाट ५ रुपैँया मासिक उठाई सुरु गरिएको कल्याणकोषमा अहिले १ करोड ९६ लाख रुपैँया रहेको र कल्याणकारी कार्य सञ्चालन गरिएको  सञ्चालक समितिका निवर्तमान अध्यक्ष दिव्यराज पौडेलले जानकारी दिए ।   

कोषका सदस्य बाबुराजा बोहराले भने । ‘हृदयघातको समस्या र मृगौला फेर्न पर्ने अवस्थामा २०६६ सालमा जीवनको आश मैले मारिसकेको थिएँ  तर कोषले आपसी सहयोग मार्फत् ५ लाख रुपैँया उपलव्ध गरायो र उपचारप्रति सकारात्मक हुन उत्प्रेरित गरेकैले मैले पुनर्जिवन प्राप्त गरेको हुँ ।’ 

४० वर्ष अघि पियन कर्मचारीलाई चश्मा किन्न सहयोगबाट सुरु गरिएको कोषको गतिविधिमा चश्मा अनुदानलाई अहिलेपनि निरन्तरता दिएको छ । त्यस्तै, कोषमार्फत् शैक्षिक प्रोत्साहन पुरस्कार, खेलकुद प्रतियोगिता, प्रसुती सहयोग, असाध्य रोगबाट पीडितलाई नगद सहयोग हुँदै आएको छ ।  २०७२ सालको भूकम्पबाट अति पीडित कर्मचारीहरुलाई कोषले एकलाख एघारहजार रुपैँया सहयोग गरेको थियो ।