तरूण दल अध्यक्षकाे गर्जन ‘गृहमन्त्री ज्यू एक पटक तपाईंको छोराको डीएनए टेस्ट गरौं’

कात्तिक १०, काठमाडौं । गृह मन्त्री रामबहादुर थापाका छोराको डीएनए परीक्षण गर्नुपर्ने नेपाल तरुण दलका अध्यक्ष जितजंग बस्नेतले बताएका छन् । निर्मला पन्तको हत्यारा पत्ता लगाउनका लागि अब गृहमन्त्रीकै छाेराकाे डिएनए परिक्षण गर्नुपर्ने उनकाे तर्क छ ।   

कांग्रेसको भातृसंगठन तरुण दलकाे ६६ औं स्थापना दिवसको अवसरमा आइतबार ललितपुरमा आयोजित कार्यक्रममा उनले यस्तो माग गरेका हुन् । ‘गृहमन्त्री ज्यूकाे छाेराकै डिएनए परिक्षण नगी हत्यारा पत्ता नलाग्ने अवस्था छ ।’ उनले भने ।   

पूर्वप्रधानमन्त्रीसमेत रहेका काँग्रेस सभापति शेरबहादुर देउवा समेत उपस्थित कार्यक्रममा बोल्दै बस्नेतले भने ‘मैले धेरैचोटी भनिसकेको छु, गृहमन्त्री रामबहादुर थापाज्यू तपाईंको छोरामाथि बलात्कारको आरोप लागेको छ, मलाई/तरुण दललाई गलत सावित गर्न एक पटक तपाईंको छोराको डीएनए टेस्ट गरौं ।’ 

२०७५ साउनमा बलात्कारपछि हत्या गरिएकी कञ्चनपुरकी १३ वर्षीय निर्मला पन्तको हत्यारा पत्ता लगाउन नसकिरहेका बेला बस्नेतले यस्तो धारणा राखेका हुन् । 

उनले मुलुकका सबै ठूला आन्दोलन कांग्रेसकै नेतृत्वमा सफल भएको र नेपालको संविधान पनि कांग्रेसकै नेतृत्वमा जारी भएको उल्लेख गर्दै कहीँ कतैबाट पनि संविधान मिच्ने काम भयो भने त्यसविरुद्ध तरुण दल सडक आन्दोलनमा उत्रिने चेतावनी दिए । तरुण दलका कोषाध्यक्ष विद्वान गुरुङले मुलुकमा भ्रष्टाचार, अनियमितता र कालोबजारी बढेको र शान्ति सुरक्षा पनि प्रभावकारीरूपमा कायम हुन नसकेको भन्दै त्यसविरुद्ध तरुण दलले सशक्त आवाज उठाउने बताए ।   

कार्यक्रममा कांग्रेसका शीर्ष नेता, केन्द्रीय सदस्यहरुका साथै पार्टी र तरुण दलका नेता कार्यकर्ताको ठूलो सङ्ख्यामा उपस्थिति थियो । तरुण दलको स्थापना विसं २०१० कात्तिक १० गते भएको हो ।