मुम्बईसँग हार्यो दिल्ली, सन्दीपले खेल्नै पाएनन्


बैशाख ६, काठमाडौं । भारतमा जारी १२ औं संस्करणको इण्डियन प्रिमियर लिग (आईपीएल) क्रिकेटमा मुम्बई इण्डियन्सले जित हात पारेको छ ।
बिहीबार भएको खेलमा नेपालका लेग स्पिनर सन्दीप लामिछाने आवद्ध टीम दिल्ली क्यापिटल्स्लाई ४० रनले हराउँदै जित हात पारेको हो ।
null
दिल्लीस्थित फिरोज साह कोट्ला क्रिकेट मैदानमा मुम्बईले दिएको १६९ रनको लक्ष्यसहित जवाफी ब्याटिङ गरेको दिल्लीले २० ओभरमा ९ विकेट गुमाएर १२९ रन मात्रै बनायो ।
दिल्लीका लागि शिखर धवनले सर्वाधिक ३५ रन जोड्दा अक्षर पटेलले २६ रन बनाए । यस्तै पृथ्वी शले २० तथा क्रिस मोरिसले ११ रन बनाए ।
मुम्बईका राहुल चाहरले ३ तथा जस्प्रित बुम्राहले २ विकेट लिए ।
मुम्बईविरुद्धको बिहीबारको खेलमा दिल्लीले नेपाली क्रिकेटर सन्दीपलाई खेलाएको थिएन ।
९ खेलबाट १२ अंक जोडेको मुम्बई जितसँगै लिगको दोस्रो स्थानमा उक्लिएको छ । पराजित दिल्ली ९ खेलबाट १० अंक जोडेर तेस्रो स्थानमा छ ।
यसअघि टस जितेर पहिले ब्याटिङ गरेको मुम्बईले २० ओभरमा ५ विकेट गुमाएर १६८ रन बनाएको थियो ।
मुम्बईका लागि कुर्नाल पाण्डयाले अविजित ३७ रन जोडे । यस्तै क्विनटन डी ककले ३५ रन जोड्दा हार्दिक पाण्डयले ३२, कप्तान रोहित शर्माले ३० र सुर्य कुमार यादवले २६ रन बनाए ।
दिल्लीका कागिसो राबडाले २ विकेट लिए ।
