२ नं. प्रदेशमा मुख्यमन्त्री बेटी पढाउ, बेटी बचाउ अभियानमा प्रभु बैंकको साथ

माघ १७, काठमाडौं । २ नं. प्रदेश कार्यालयले सञ्चालनमा ल्याएको बेटी पढाउ, बेटी बचाउ अभियानलाई प्रभु बैंकले सहकार्य गरेको छ । 

हिजो बुधबार प्रदेश नं. २ स्थित मुख्य मन्त्री तथा मन्त्रीपरिषदको कार्यालय र प्रभु बैंक लिमिटेडका विच मुख्यमन्त्री बेटी पढाउ, बेटी बचाउ अभियानमा सम्झौता भएको छ । मुख्यमन्त्री बेटी पढाउ, बेटी बचाउ अभियान अन्तरगत छोरी शिक्षा बीमा/मुद्दती बचत कार्यक्रम सञ्चालन हुनेछ । 

null

सम्झौतामा २ नं. प्रदेशस्तरीय मुख्यमन्त्री तथा मन्त्री परिषदको कार्यालयको तर्फबाट सचिव हरिप्रसाद फुयाल र प्रभु बैंक लि. का तर्फबाट सहायक महाप्रबन्धक अशोक खडगीले सम्झौतामा हस्ताक्षर गरी प्रदेश नं. २ का मुख्यमन्त्री लालबहादुर राउतलाई हस्तान्तरण गरेका थिए । 

सम्झौता अनुसार पहिलो चरणमा प्रदेश नं. २ अन्तर्गतका पर्सा, बारा, रौतहट, सर्लाही, महोत्तरी, धनुषा, सिराहा र सप्तरी जिल्लामा अभियान सञ्चालनमा आएको छ । मन्त्रालयको सम्झौताको आधारमा यो कार्यक्रम अन्य जिल्लाहरुमा समेत विस्तार हुनेछ । 

यो अभियान अन्तर्गत २०७५ माघ १ गते पश्चात् माथि उल्लेखित ८ जिल्लामा जन्मिएका छोरीहरुको नाममा मुख्यमन्त्री तथा मन्त्रिपरिषदको कार्यालयको सिफारिसको आधारमा प्रभु बैंक लिमिटेडले २० वर्षको अवधिको लागि मुद्दती खाता खोलिदिनेछ । 

मन्त्रालयले प्रदान गर्ने रु. १३ हजार ६ सय ४६ रुपैयाँ १५ पैसामा खोलिएको मुद्दती खाता २० वर्षपछि सम्बन्धित छोरीको अभिभावकले एकमुष्ठ १ लाख रुपैयाँ पाउने व्यवस्था रहेको छ । खाता खोलिएको छोरीको मृत्यू भएमा वा कडा रोग लागेको प्रमाणित भएका वा अभिभावकको मृत्यु भएमा मन्त्रालयको सिफारिसको आधारमा खातामा जम्मा भएको रकमको साँवा र व्याज प्राप्त गर्न सकिने व्यवस्था समेत रहेको छ । 

प्रदेश नं. २ स्थित मन्त्रीपरिषदको कार्यालयले सञ्चालनमा ल्याएको लेकप्रिय कार्यक्रम मुख्यमन्त्री बेटी पढाउ, बेटी बचाउ अभियानमा बैंकिङ्ग सहकार्य गर्दै प्रभु बैंक लि. ले आफुलाई व्यवसायिक मात्र नभएर सामाजसेवी बैंकको रुपमा स्थापित गराउन अग्रसर रहेको छ । प्रभु बैंकले यस अभियानलाई आफ्नाे सामाजिक उत्तरदायित्व वहन गर्ने अवसरको रुपमा लिएको छ ।