काठमाडौं किंग्सको विजयी सुरुवात, चितवनको लगातार दोस्रो हार
मकालु खबर
मंसिर २४, काठमाडौँ । एभेरेष्ट प्रिमियर लिग (इपिएल) टी–ट्वान्टी क्रिकेटमा काठमाडौँ किंग्सले विजयी सुरुवात गरेको छ ।
पृथु बास्कोटाको कप्तानीमा रहेको चितवन टाइगर्सलाई ६ विकेटले हराउँदै सोमपाल कामीको कप्तानीमा रहेको काठमाडौं किंग्स इलाभेनले विजयी सुरुवात गरेको हो ।
null
सोमबार भएको खेलमा चितवनले दिएको १६१ रनको लक्ष्य पछ्याएको काठमाडौँले १८ ओभर ५ बलमा मात्र ४ विकेट गुमाएर पुरा गर्यो । काठमाडौँका लागि भारतीय खेलाडी सुब्रामन आनन्दले १८ बलमा अविजित ४३ रन जोडे । अमर सिंह रौटेला २१ रनमा अविजित रहे ।
काठमाडौंका लागि सागर पुनले ३९ रन, नरेश बुढाएरले २२ र अमित श्रेष्ठले १८ रन जोडे । चितवनका साहब आलमले २ विकेट लिए ।
यसअघि टस हारेर पहिले ब्याटिङ गरेको चितवनले १९ ओभर ५ बलमा अलआउट हुँदै १६० रन बनाएको थियो ।
चितवनका लागि दिपेन्द्र सिंह ऐरीले ४५ रन, पल स्टर्लिङले ३४ रन, सन्दीप सुनारले २५ रनको योगदान दिए भने पृथु बास्कोटा २० रनमा अविजित रहे ।
काठमाडौंका संसद सेख र प्रदीप साहुले ३–३ विकेट लिए ।
जितसंगै काठमाडौंले २ अंक जोडेको छ । चितवनले भने लगातार दोस्रो हार व्यहोरेको छ । चितवनले २ खेलबाट अंक जोड्न सकेको छैन ।
यसअघि पहिलो खेलमा चितवन ललितपुर प्याट्रीयट्ससंग ११ रनले पराजित भएको थियो ।
मकालु खबर
