आर्सनलको सहज जित, पोल्टभा ४–२ ले पराजित

“

एजेन्सी, असोज ५ ।  इंग्लिस क्लब आर्सनलले युरोपा लिगमा युक्रेनको भोर्सक्ला पोल्टभालाई ४–२ गोलअन्तरले पराजित गरेको छ । बिहीबार राति भएको समूह र्इको खेलमा आर्सनलले सहज जित हात पारेको हो ।

३२ औं मिनेटमा आबुमियाङको गोलबाट आर्सनलले अग्रता बनाएको थियो । पहिलो हाफमा १–० गोलले अघि रहेको आर्सनलले दोस्रो हाफमा ३ गोल गर्दा भोर्सक्ला पोल्टभाले २ गोल फर्काउन सफल भयो ।

यसपछि आर्सनलले २ गोल खान पुग्यो । ७६ औं मिनेटमा पोल्टभाका चेस्नाभोले गोल गर्दै ४–१ गोलको स्थितिमा पुर्‍याएका थिए । इन्जुरी समयमा भिएचास्लाभ सार्परले गोल गर्दै पोल्टभालाई ४–२ गोलको स्थितिमा पुर्‍याए पनि आर्सनललाई रोक्न भने सकेनन् ।

बिहीबार राति नै यसै समूहको अर्को खेलमा पोर्चुगलको स्पोर्टिङ लिस्बोनले अजरबैजानको क्वाराबागलाई २–० गोलले पराजित गरेको छ ।

“