यूएईलाई पराजित गर्दै एसिया कपमा छानियो हङकङ

“काठमाडौं, भदौ २२ । फाइनलमा यूएईलाई पराजित गर्दै हङकङ एसिया कपमा छनोट भएको छ । यूएईमा आउँदो सेप्टेम्बर १५ देखि २८ सम्म हुने प्रतियोगितामा हङकङले भारत र पाकिस्तान रहेको समूह ए बाट खेल्नेछ ।

एसिया कपमा एशियाका पाँच टेष्ट राष्ट्रहरु भारत, पाकिस्तान, श्रीलंका, बंगलादेश र अफगानिस्तान स्वतः छनोट भएका थिए भने हङकङले छनोट खेलेको हो ।

बिहीबार भएको फाइनलमा युएईले आफ्नै मुलुकमा हुने एशिया कप खेल्ने मौका गुमायो । हङकङसँग डकवर्थ लुइस नियमका आधारमा २ विकेटले पराजित भएपछि यूएईको एसिया कप यात्रा अघि बढेन ।

किनरारा ओभलमा भएको फाइनलमा २४ ओभरमा घटाइएको खेलमा यूएईले दिएको १७९ रनको लक्ष्य हङकङले ३ बल अगावै ८ विकेट गुमाएर पुरा गरेको हो ।

त्यसअघि टस हारेर पहिले ब्याटिङ गरेको युएईले २४ ओभरमा ९ विकेट गुमाएर १७६ रन बनाएको थियो ।

प्रतियोगितामा दुई जीत र तीन हार ब्यहोरेको नेपाल भने समूह चरणबाटै बाहिरिएको थियो ।”