पीएसजीको जीतमा सबै स्टारको गोल, एम्बाप्पेलाई रातो कार्ड

“एजेन्सी, भदौ १७ । पेरिस सेन्ट जर्मेनले लिग वानमा निम्समाथि जित हात पारेको छ । शनिबार राति भएको खेलमा पीएसजीले निम्सलाई ४-२ गोल अन्तरले हराएको हो ।

निम्सको घरेलु मैदानमा भएको खेलमा पीएसजीले ३६ औं मिनेटमा नेइमारको गोलबाट अग्रता लिएको थियो । चार मिनेटपछि एन्जल डी मारियाले गोल गरेपछि पहिलो हाफमा पीएसजी २-० ले अगाडि रहृयो ।

दोस्रो हाफमा घरेलु टोली खेलमा फर्कियो । ६३ औं मिनेटमा बोबिचोनले गोल गरे भने ७१ औं मिनेटमा साभानिरले पेनाल्टीमार्फत बराबरी गोल फर्काए । तर, खेलको ७७ औं मिनेटमा एम्बाप्पेले गोल गर्दै पीएसजीलाई अग्रता दिलाए । इन्जुरी टाइममा काभानीले गोल गर्दै जित सुनिश्चित गरे ।

तर, साभानिरले एबाप्पेलाई फल गरेपछि खेल तनावपूर्ण भयो । त्यसक्रममा एम्बाप्पे र साभानिर दुबैले रातो कार्ड खाएका छन् । खेलमा नेइमारले भने गोल गरेपछि सेलिब्रेसनका क्रममा विपक्षी समर्थकहरुलाई गिज्याएका थिए ।”