नोबेलको ईमर्जेन्सी सेवामा व्यापक सुधारः बिरामीको सहजताका लागि ‘रेसपोन्स टिम’ परिचालन (भिडियो रिपोर्टसहित)

“

विराटनगर, भदौ ६ । विराटनगर स्थित नोबेल शिक्षण अस्पतालले बिरामीको सेवा र सहजताका लागि आकस्मिक कक्षको सेवामा व्यापक सुधार गरेको छ । नोबेलले ईमर्जेन्सी कक्षको सेवालाई थप सुधार गरेर छिटो, छरितो र प्रभावकारी बनाएको हो ।

बिरामीको सहजताका लागि आकस्मिक कक्षमा स्वास्थ्यकर्मीको संख्या बढाउनुका साथै २४ सै घण्टा ‘रेसपोन्स टिम’ र ‘ट्रली ब्वाई’ परिचालन गरिएको छ । आकस्मिक अवस्थामा आएका बिरामीलाई खर्च अभाव भएमा सर्तनामा गराएर उपचार गराउन कर्मचारी पनि खटाइएको अस्पतालका प्रबन्ध निर्देशक इन्दिरा शर्माले जानकारी दिइन् ।

उनका अनुसार बिरामीलाई सहज रुपमा आकस्मिक कक्षमा पुर्याउन २४ सै घण्टा अस्पतालको गेटमा ‘ट्रली ब्वाई’ खटाईएको हो । ‘ट्रलि ब्वाई’ ले बिरामी आईपुग्ने बित्तिकै एम्बुलेन्सबाट बिरामीलाई निकालेर सकेसम्म छिटो उपचारका लागि आकस्मिक कक्षमा पुर्याउने गर्छन् ।

यता, बिरामीलाई तुरुन्त उपचारका लागि ९ जना स्वास्थ्यकर्मीको ‘इमर्जेन्सी रेस्पोन्स टिम’ परिचालन गरिएको छ । बिरामीलाई आवश्यकता अनुसार तत्काल शल्यक्रिया वा सघन उपचारका लागि अस्पताल सञ्चालक र अस्पताल प्रशासनका प्रतिनिधिले निगरानी गरी ढिलाई हुन नदिन प्रभावकारी भूमिका निर्वाह गर्ने गर्छन् ।

ईमर्जेन्सीमा २ जना बिरामी बराबर एकजना नर्सिङ स्टाफ खटाइएको छ । उनीहरुले बिरामीसँग सम्बन्धित डाक्टरलाई बोलाएर आवश्यकता अनुसार उपचारको व्यवस्थापन मिलाउने गर्छन् । रेसपोन्स टिमसँगै न्यूरो सम्बन्धि बिरामीका लागि तत्कालै उपचारको व्यवस्थापन गर्न न्यूरोका नर्सहरुको छुट्टै टिम पनि परिचालन गरिएको ईमर्जेन्सी ईन्चार्ज डा. अमितकुमार अग्रहरीले बताए ।

ईमर्जेन्सीमै भेन्डिलेटरसहितको आईसीयू कक्षको पनि व्यवस्था मिलाइएको छ । ईमर्जेन्सीमा इसीजी, ल्याब परीक्षण, अल्ट्रासाउण्ड, एक्सरे लगायतको व्यवस्था गरेपछि बिरामीको उपचारमा थप सहज भएको छ । ईमर्जेन्सी कक्षमा २४ सै घण्टा विशेषज्ञ डाक्टरसहितको टिम खटिने गर्छन् ।

पहिलेको तुलनामा डाक्टरहरुको संख्या पनि वृद्धि गरिएको छ । नोबेल अस्पताल सञ्चालक डा. सुनिल शर्माले ईमर्जेन्सी सेवालाई प्रभावकारी बनाउन चासो देखाएपछि ईमर्जेन्सी कक्षको सेवालाई थप सुधार गरी छिटो, छरितो र गुणस्तरीय बनाइएको हो ।

नोबेलले ईमर्जेन्सी सेवामा सुधार गरेपछि उपचारमा सहज भएको बिरामी र बिरामीका आफन्तको भनाइ छ । उपचारका लागि आमालाई नोबेल लिएर आएका सुनसरी ईनरुवाका शिशिर दत्त र हजुरआमाको उपचारका लागि नोबेल आएका मोरङ पथरीशनिश्चरेका लालबहादुर बुढाथोकीले नोबेलको ईमर्जेन्सी सेवामा व्यापक सुधार पाएकाले उपचारमा धेरै सहज भएको प्रतिक्रिया दिए । उनीहरु जस्तै अधिकांश बिरामी र बिरामीका आफन्तले उपचारमा सहज भएको प्रतिक्रिया दिने गरेका छन् ।

इमर्जेन्सीमा आउने बिरामीहरुलाई कुनै किसिमको समस्या नहोस् भनेर अस्पतालको गेट देखिनै स्वास्थ्यकर्मी र कर्मचारी परिचालन गरिएपछि बिरामीले पनि सहज अनुभूति गर्न पाएका हुन् ।

गुणस्तरीय सेवालाई प्राथमिकता दिँदै आएको नोबेल अस्पतालले आवश्यकता अनुसार सेवामा स्तरीयता बढाउँदै लगेपछि बिरामीको आकर्षण पनि बढ्दै गएको छ ।

भिडियोः

https://youtu.be/x9078_M7mrE”