सरकारले जनतालाई सुरक्षा दिन नसकेको नेम्वाङको आरोप

“मंसिर १० काँकडभिट्टा, ।  नेकपा एमालेका नेता सुवास नेम्वाङले निर्वाचनको बेला प्रधानमन्त्री शेरबहादुर देउवाले गृहमन्त्री पद पनि लिएर जनतालाई सुरक्षा दिन नसकेको आरोप लाएका छन् ।

झापाको बिर्तामोडमा प्रेस चौतारी झापाले आयोजना गरेको पत्रकार सम्मेलनमा पूर्वसभामुख नेम्वाङले उम्मेदवार माथिको हमलाले मुलुकमा गृहमन्त्री भएको अनुभूति नभएको बताए ।

उम्मेदवारको घरमा बम हान्ने र मतदातालाई त्रसित बनाउने काम भइरहेको प्रति चिन्ता व्यक्त गर्दै नेता नेम्वाङले सरकार चुनावलाई मर्यादित बनाउने भन्दा पनि भ्रमको खेती गर्न व्यस्त भएको दोषारोपण गरे ।

नेता नेम्वाङले वामपन्थीको सरकार निर्माण गरेर स्थिर सरकारमार्फत मुलुकको विकास गरिने जिकिर समेत दिए । रासस”