प्रधानमन्त्री देउवाले गुरुको हातबाट टीका लगाए, प्रचण्ड निवासमा बर्षौपछि दशैं
![](https://www.makalukhabar.com/wp-content/uploads/2023/10/Final-icon-Logo-2023.png)
![](https://www.makalukhabar.com/wp-content/uploads/2021/01/nophoto.png)
“
काठमाडौं, असोज १४ । प्रधानमन्त्री शेरबहादुर देउवाले आफ्ना गुरु विनोद सापकोटाबाट टीका ग्रहण गरे ।
प्रधानमन्त्रीको सरकारी निवास बालुवाटारमा ११ बजेर ५५ मिनेटको शुभसाइतमा उनले सापकोटाको हातबाट टीका ग्रहण गरेको प्रधानमन्त्रीको निजी सचिवालयले जनाएको छ ।
प्रधानमन्त्री देउवाले राष्ट्रपति विद्यादेवी भण्डारीको हातबाट पनि टीका ग्रहण गरे ।
यता, नेकपा माओवादी केन्द्रका अध्यक्ष पुष्पकमल दाहालले पनि वर्षौपछि दशैंको टीका लगाएका छन् ।
दाहालले श्रीमती सीता, छोरा प्रकाश र छोरी रेणु दाहालसहित परिवारको साथ टीका लगाएको तस्वीर छोरा प्रकाशले फेसबुकमा राखेपछि यो टीका लगाएको कुरा सार्वजनिक भएको हो ।
यसैगरी, नयाँ शक्ति पार्टी नेपालका संयोजक डा. बाबुराम भट्टराईले बुबा भोजप्रसाद भट्टराईको हातबाट विजयादशमीको टीका लगाए ।
डा. भट्टराईले आफ्नो ट्वीटर र फेसबुकमा टीका लगाएको तस्वीर राख्दै ‘हामी सबैको भलो होस्, देश र जनताको भलो होस्, नेपाल हाम्रै पालामा समृद्ध बनोस्’ भन्ने कामना गरेका छन् ।
यता, नेपाली काँग्रेसका वरिष्ठ नेता रामचन्द्र पौडेलले बडादशैँको अवसरमा आफ्ना दाजु बन्धुराज पौडेलबाट टीका ग्रहण गरेका छन् ।
राजधानीको कलंकीमा टीकाको शुभसाइतको समयमा वरिष्ठ नेता पौडेलले टीका ग्रहण गरेका हुन् ।
त्यसपछि वरिष्ठ नेता पौडेलले परिवारजन, इष्टभित्र र पार्टीका नेता तथा कार्यकर्तालाई आफ्नो निवास बोहोराटारमा दशैंको टीका जमरा लगाइदिए ।
“
![](https://www.makalukhabar.com/wp-content/uploads/2023/10/Final-icon-Logo-2023.png)