योजना आयोगको उपाध्यक्षमा डाक्टर वाग्ले नियुक्त

“

साउन १९, मकालु खबर । सरकारले राष्ट्रिय योजना आयोगको उपाध्यक्षमा डाक्टर स्वर्णिम वाग्लेलाई नियुक्त गरेको छ । राष्ट्रिय योजना आयोगका सदस्य समेत रहेका वाग्लेलाई विहिबार बिहान सिंहदरबारमा बसेको मन्त्रीपरिषद् बैठकले उपाध्यक्ष पदमा नियुक्त गर्ने निर्णय गरेको हो । वाग्लेले अमेरिकाको हार्भड विश्वविद्यालयबाट अन्तराष्ट्रिय विकासमा स्नातकोत्तर , वेलायतको लण्डन स्कुल अफ इकोनोमिक्सबाट अर्थशास्त्रमा स्नातक र अष्ट्रेलियाबाट अर्थशास्त्रमा विद्यावारिधी गर्नुभएको छ ।

सार्वजनिक वित्त तथा अन्तराष्ट्रिय व्यापार एवं लगानी सम्बन्धी विज्ञ वाग्लेले विश्व बैकको मुख्यालय वासिङटन डिसिमा वरिष्ठ अर्थशास्त्रीको रुपमा समेत लामो समय काम गर्नुभएको थियो । बैठकले अमेरिकाको विकास सम्बन्धी मिलिनियन च्यालेन्ज कर्पोरेशनले सडक यातायात र विद्युत् प्रशारणका लागि दिएको सहयोग अनुदान ५१ अर्ब ३८ करोड रुपैया स्वीकृत गरेको छ । त्यसैगरी बैठकले ११ जना प्रहरी नायब महानिरीक्षकको बढुवा गर्ने निर्णय समेत गरेको छ ।

प्रहरी नायब महानिरीक्षकबाट प्रहरी अतिरिक्त महानिरीक्षक पदमा बढुवा हुनेहरुमा बम बहादुर भण्डारी, जय बहादुर चन्द, देवेन्द्र सुवेदी, पशुपति उपाध्याया, केशरी राज घिमिरे , माधव प्रसाद जोशी, बिजयलाल कायश्थ, कमल सिंह बम, मिङमार लामा, रणबहादुर चन्द र बिजय कुमार भट्टराई छन् ।

“