नेपालका स्थानीय उत्पादन संरक्षण गर्न कानुन ल्याइन्छ: मन्त्री यादव

काठमाडौं । उद्योग, वाणिज्य तथा आपूर्तिमन्त्री गौरीकुमारी यादवसँग खाद्य तथा कृषि सङ्गठन (एफओ) का नेपाल प्रतिनिधि केन सिमिजुले शिष्टाचार भेट गरेकी छन् ।

मन्त्रालयमा भएको भेटमा उनीहरू बीच नेपालका विभिन्न भौगोलिक क्षेत्रमा उत्पादन हुने स्थानीय वस्तुलाई ब्रान्डिङ गर्ने र तिनलाई स्थायित्व दिने विषयमा छलफल भएको थियो ।

त्यस अवसरमा मन्त्री यादवले नेपालका स्थानीय उत्पादनको संरक्षण र प्रवद्र्धनका लागि आवश्यक कानुन तर्जूमाको पहल सुरु भएको जानकारी गराएको मन्त्रालयले जनाएको छ ।

खाद्य तथा कृषि सङ्गठनका प्रतिनिधि केनले विश्वका अधिकांश राष्ट्रमा जीआई प्रणाली लागू भइसक्दा पनि नेपालमा भने अझै प्रयोगमा आउन नसकेकोप्रति ध्यानाकर्षण गराए ।

स्थानीय वस्तुको जीआई दर्ता नहुँदा बहुमूल्य ब्रान्ड अन्य देशले दर्ता गरिरहेको र त्यसको प्रत्यक्ष मार नेपालले खेप्नुपरेको उल्लेख गर्दै उनले यसलाई रोक्न तत्काल कानुन बनाएर कार्यान्वयनमा लैजान पर्नेमा जोड दिए ।