मेस्सीले हामीलाई फुटबल कला पनि हुन सक्छ भन्ने सिकाए: लामिन यामल

एजेन्सी । स्पेनका युवा स्टार लामिन यामलले विश्वकप फाइनलपछि अर्जेन्टिनाका कप्तान लियोनेल मेस्सीप्रति सम्मान व्यक्त गर्दै उनी आफ्नो प्रेरणाको स्रोत रहेको बताएका छन् ।

विश्वकप उपाधि जितेपछि दिएको प्रतिक्रियामा यामलले मेस्सीलाई केवल प्रतिद्वन्द्वीका रूपमा नभई आफूजस्ता लाखौँ बालबालिकालाई फुटबलप्रति सपना देख्न प्रेरित गर्ने खेलाडीका रूपमा स्मरण गरेका हुन् ।

‘आज मैले स्पेनका लागि विश्वकप उचालेँ । तर योभन्दा ठूलो कुरा भविष्यमा आफ्ना सन्तानलाई सुनाउने एउटा अविस्मरणीय कथा पाएको छु । कुनै बेला मलाई काखमा समातेको व्यक्ति आज मैदानको अर्को छेउमा उभिएर मेरोजस्तै विश्वकप जित्ने सपना पूरा गर्न संघर्ष गरिरहेका थिए । फुटबलले जीवनका चक्रलाई यति सुन्दर ढंगले देखाउँछ,’ यामलले भनेका छन् ।

उनले फाइनलपछि मेस्सीलाई हेर्दा आफूले केवल विपक्षी खेलाडी नभई फुटबललाई कला बनाउन सिकाउने व्यक्तित्व देखेको उल्लेख गरेका छन् ।

‘मैले त्यहाँ त्यो खेलाडी देखेँ, जसले मलगायत लाखौँ बालबालिकालाई फुटबल केवल खेल नभई कला पनि बन्न सक्छ भन्ने विश्वास दिलाए । उनका भिडियो पटक–पटक हेर्दै मैले धेरै कुरा सिक्ने प्रयास गरेको थिएँ,’ उनले भने ।

यामलले हारपछि पनि मेस्सीले देखाएको खेल भावना र संघर्षको प्रशंसा गर्दै उमेरको यो चरणमा पनि देशका लागि विश्वकप फाइनल खेल्नु आफैंमा च्याम्पियनको परिचय भएको बताएका छन् ।

‘यो हारले उनलाई पीडा दिएको छ भन्ने मलाई थाहा छ । तर यस्तो उमेरमा पनि देशको जर्सी लगाएर विश्वकप फाइनल खेल्नु, अन्तिमसम्म संघर्ष गरिरहनु च्याम्पियनको पहिचान हो,’ उनले भने ।

यामलले मेस्सीको योगदान कुनै एक विश्वकपको नतिजाभन्दा धेरै ठूलो रहेको उल्लेख गरेका छन् ।

‘आजको रात स्पेनको हो । तर लियोनेल मेस्सीप्रतिको मेरो सम्मान कहिल्यै बदलिने छैन । उनी महान् खेलाडी हुन् भनेर प्रमाणित गर्न विश्वकप फाइनल जित्न आवश्यक थिएन । उनीसँग एउटै मैदानमा खेल्न पाउनु नै मेरो जीवनभरको सम्झना हुनेछ,’ उनले भने ।