विश्वकपमा केप भर्डेको ऐतिहासिक उपलब्धि, उरुग्वेसँग २–२ को बराबरी गर्दै पहिलो गोलको कीर्तिमान
दुई पटकको विश्व विजेता उरुग्वेसँग २–२ को बराबरी खेल्दै केप भर्डेले विश्वकप इतिहासमा पहिलो पटक गोल गर्न सफल भएर ऐतिहासिक उपलब्धि हासिल गरेको हो
मकालु खबर
काठमाडौँ। फिफा विश्वकप २०२६ मा अफ्रिकी राष्ट्र केप भर्डे (काबो भर्डे) ले आफ्नो फुटबल इतिहासकै सबैभन्दा स्मरणीय क्षण रचेको छ। दुई पटकको विश्व विजेता उरुग्वेसँग २–२ को बराबरी खेल्दै केप भर्डेले विश्वकप इतिहासमा पहिलो पटक गोल गर्न सफल भएर ऐतिहासिक उपलब्धि हासिल गरेको हो।
अमेरिकाको फ्लोरिडास्थित मियामी स्टेडियममा नेपाली समय अनुसार सोमबार बिहान भएको समूह ‘एच’ अन्तर्गतको खेलमा दुवै टोलीले अग्रता लिए पनि जोगाउन नसक्दा अङ्क बाँड्न बाध्य भए। तर नतिजाभन्दा बढी चर्चामा केप भर्डेको ऐतिहासिक प्रदर्शन रह्यो।
खेलको २१औँ मिनेटमा केभिन पिनाले आकर्षक गोल गर्दै केप भर्डेलाई अग्रता दिलाएका थिए। विश्वकपमा टोलीको यो पहिलो गोल थियो। गोलसँगै खेलाडीहरू भावुक बन्दै खुसी मनाएको दृश्यले मैदानमा विशेष माहौल सिर्जना गरेको थियो।
सुरुआती झट्कापछि उरुग्वेले खेलमा पुनरागमन गर्यो। ४४औँ मिनेटमा म्याक्सी अराउजोले बराबरी गोल फर्काए भने पहिलो हाफको इन्जुरी समयमा अगुस्टिन कानोबियोले गोल गर्दै उरुग्वेलाई २–१ को अग्रता दिलाए।
तर केप भर्डेले हार नमानी दोस्रो हाफमा उत्कृष्ट सङ्घर्ष जारी राख्यो। ६१औँ मिनेटमा उरुग्वेका डिफेन्डर र गोलकिपर बिच तालमेल नमिल्दा हेलियो भारेलाले अवसरको सदुपयोग गर्दै बराबरी गोल गरे। त्यसपछि दुवै टोलीले थप केही अवसर सिर्जना गरे पनि गोल निकाल्न सकेनन् र खेल २–२ को बराबरीमा सकियो।
केप भर्डेका लागि यो बराबरी केवल एक अङ्कको उपलब्धि मात्र होइन। विश्वकपमा पहिलो गोल, पहिलो पटक लगातार प्रतिस्पर्धात्मक प्रदर्शन र विश्व फुटबलको शक्तिशाली टोली उरुग्वेविरुद्ध अङ्क खोस्नु सानो टापु राष्ट्रका लागि ठुलो उपलब्धि बनेको छ। यसअघि पनि केप भर्डेले समूह चरणमै स्पेनसँग बराबरी खेलेर सबैलाई चकित पारेको थियो।
यो नतिजापछि समूह ‘एच’ मा उरुग्वे र केप भर्डे दुवैले दुई खेलबाट समान २ अङ्क बनाएका छन्। दुई खेलबाट ४ अङ्क जोडेको स्पेन समूहको शीर्ष स्थानमा रहेको छ भने साउदी अरेबियाको खातामा १ अङ्क छ। समूहको अन्तिम चरणका खेलले नकआउट चरणको समीकरण तय गर्ने भएकाले सबै टोलीका लागि आगामी खेल निर्णायक बनेका छन्।
अब केप भर्डेले जुन २७ मा साउदी अरेबियाविरुद्ध आफ्नो समूह चरणको अन्तिम खेल खेल्नेछ। पहिलो विश्वकप गोलको इतिहास र उरुग्वेविरुद्धको प्रेरणादायी प्रदर्शनपछि केप भर्डे नकआउट चरणको सम्भावना जीवित राख्दै अर्को ऐतिहासिक उपलब्धिको खोजीमा मैदान उत्रनेछ।
मकालु खबर
