देशभरका अस्पतालमा डायलासिस सेवा विस्तार गर्न सांसद खातुनको माग

बुधवार बसेको प्रतिनिधि सभा बैठकमा बोल्दै सांसद सिद्धिकीले राप्ती प्रादेशिक अस्पतालमा डायलासिस मेसिनको अभावका कारण बिरामीहरूले ठूलो सास्ती भोग्नुपरेको भन्दै सरकारको ध्यानाकर्षण गराइन् ।

उनले मेसिन अभावकै कारण बिरामीहरू उपचारका लागि काठमाडौं धाउन बाध्य भएको र त्यसले उनीहरूमाथि थप आर्थिक भार परेको बताइन् ।

‘सेवा प्रवाह, नागरिकको भलाइ र अधिकारको संरक्षणको सन्दर्भमा मानव अधिकारको प्रत्याभूति हुनुपर्दछ,’ सांसद सिद्धिकीले भनिन्, ‘तर राप्ती प्रादेशिक अस्पतालमा डायलासिस मेसिनको कमीले बिरामीहरू आर्थिक समस्या झेल्दै काठमाडौं धाउनुपर्ने अवस्था छ ।’

उनले बिरामी तथा उनीहरूका परिवारले भोगिरहेको समस्यालाई मध्यनजर गर्दै देशभरका कुन–कुन अस्पतालमा डायलासिस मेसिन आवश्यक छ भन्नेबारे अध्ययन गर्न सरकारलाई सुझाव दिइन् ।

सभामुखमार्फत नेपाल सरकारलाई आग्रह गर्दै सांसद सिद्धिकीले आगामी दिनमा आवश्यकताअनुसार सबै सरकारी अस्पतालमा डायलासिस मेसिन उपलब्ध गराउन माग गरिन् ।